Ózbekstannan shetelge turaqty turý úshin kóshkenderdiń sany artty
ASTANA. KAZINFORM — 2025 jyldyń birinshi 6 aıynda 2024 jyldyń sáıkes kezeńimen salystyrǵanda shetelge turaqty turý úshin kóshkenderdiń sany shamamen 10 paıyz ósti. Bul týraly aqparat Statıstıka komıtetiniń kezekti sholýynda berilgen.
Sońǵy jarty jylda Ózbekstannan 5551 adam turaqty turý úshin shetelge kóship ketken. Alaıda burynǵylardan aıyrmashylyǵy, turǵyndardyń qaı elderge ketkeni aıtylmady.
Salystyrý úshin, 2024 jyldyń alǵashqa 6 aıynda 5066 ózbekstandyq shetelge kóship ketken. Onyń eń kóbi Qazaqstanǵa ketken – 4128 adam. Odan keıingi orynda Reseıdi tańdaǵandar kóbirek boldy (760 adam).
2025 jyldyń 6 aıynda Ózbekstanǵa shetelden kóship kelgenderdiń sany 673 adam boldy. Ótken jyldyń sáıkes kezeńinde bul kórsetkish 1800 bolǵan.
Shetelge kóshý úrdisi
2024 jyly 10 842 ózbekstandyq turaqty turý úshin shet elderge kóshti. Onyń ishinde Qazaqstanǵa 8 myń 792 adam, Reseıge 1 myń 601 adam ketken. Elden ketkender Ońtústik Koreıa (96 adam), Qyrǵyzstan (73 adam), Túrkimenstan (39 adam) jáne basqa elderdi (241 adam) tańdady.
2023 jylǵy kórsetkish boıynsha shetelge qonys aýdarǵandar sany 17 336 adamdy quraǵan. Atap aıtqanda, Qazaqstanǵa 14 myń 51 adam, Reseıge 2 myń 670 adam kóship ketken.
10 jyl buryn sandar áldeqaıda joǵary boldy. Máselen, 2010 jyly Ózbekstannan 44 420, 2011 jyly 50 816, 2012 jyly 45 447 adam kóship ketken. 2015 jyldan bastap kóshý úrdisi aıtarlyqtaı tómendeı bastady, sol jyly elden 31 765 adam kóship ketti.
Eske sala keteıik, Ózbekstan halqynyń sany 38 mıllıonǵa jýyqtady.