Ózbekstannan Qazaqstanǵa qandaı taýarlar kóp eksporttalady

TAShKENT. QazAqparat – Aǵymdaǵy jyldyń 8 aıynda Ózbekstan Qazaqstanǵa jalpy kólemi 763,9 myń dollar bolatyn jıhaz ónimderin eksporttaǵan, dep habarlaıdy QazAqparat Ózbekstan Respýblıkasynyń memlekettik statıstıka komıtetiniń saıtyna silteme jasap.

«2020 jyldyń 1 qyrkúıegindegi derekter boıynsha, Ózbekstannyń shet elderge eksporttaǵan jıhaz ónimderiniń jalpy somasy 2 mln dollardy qurady. Bul 2019 jyldyń osy kezeńimen salystyrǵanda 841 myń dollarǵa kóp. Sońǵy segiz aıda eksporttalǵan jıhaz ónimderinń eń kóp úlesi Qazaqstanǵa (763,9 myń dollar), Qyrǵyzstanǵa (619,3 myń dollar), Tájikstanǵa (294,2 myń dollar) jáne Reseıge (146,6 myń dollar) tıesili», - dep málimdedi Ózbekstan Respýblıkasynyń memlekettik statıstıka komıteti.

Sondaı-aq, 8 aı qorytyndysy boıynsha Ózbekstannan Qazaqstanǵa eksporttalǵan shyny ydystar men shyny buıymdardyń jalpy somasy 7,4 mln dollardy quraǵan.

«2020 jyly Ózbekstan 14 memleketke 11,6 mln dollardyń shyny ydystary men shyny buıymdaryn eksporttady. Onyń basym bóligi Qazaqstan (7,4 mln dollar), Túrikmenstan (1,9 mln dollar), Tájikstan (976,5 myń dollar), Qyrǵyzstan (589,7 myń dollar), Grýzııa (435,4 myń dollar) jáne Reseı Federatsııasy (204,1 myń dollar) úlesine keldi», - dep jazdy Ózbekstan Respýblıkasynyń memlekettik statıstıka komıteti.

Budan ózge, 8 aı ishinde Qazaqstan Ózbekstanǵa 47,7 mln lıtr benzın eksporttaǵan.

«2020 jyldyń 1 qyrkúıegindegi málimetter boıynsha, Ózbekstan shet elderden 90,1 mln lıtr benzın ımporttady. Bul kórsetkish ótken jyldyń sáıkes kezeńimen salystyrǵanda 87 mln lıtrge artyq. Ózbekstan janar-jaǵarmaıdy eń kóp kólemde Qazaqstannan (47,7 mln lıtr), Reseıden (36,5 mln lıtr), Túrikmenstannan (5,6 mln lıtr) jáne Qyrǵyzstannan (232,1 myń lıtr) satyp aldy», - dep málim etti Ózbekstannyń memlekettik statıstıka komıteti.

Avtor: Álıhan Asqaruly