Ózbekstannan Qazaqstanǵa 20 keli geroın ótkizbek bolǵandar ustaldy
«ÓzA» saıtynyń habarlaýynsha, Ózbekstan Memlekettik qaýipsizdik qyzmetiniń Syrdarııa oblystyq basqarmasynyń qyzmetkerleri júrgizgen jedel sharalardyń arqasynda Tájikstannan Ózbekstan arqyly Qazaqstanǵa kóp mólsherde esirtki ótkizbek bolǵandar ustaldy.
Tájikstan azamaty esirtkini kontrabanda jolymen Ózbekstanǵa kirgizip, Tashkentte turatyn tanysynyń úıinde saqtaǵan.
Ózbekstannyń arnaýly qyzmetteriniń derekterine súıensek, esirtki tranzıtin uıymdastyrǵan – Qazaqstan azamaty, Túrkistan oblysynyń turǵyny. Ol Syrdarııa oblysynyń aınalma joly arqyly elimizge esirtki kirgizbek bolǵan jerinen ustaldy.
Saraptama nátıjesinde aıǵaq retinde alynǵan zat geroın ekeni anyqtaldy. Salmaǵy 20 keli 32 gramm. Mamandardyń sózine qaraǵanda, tárkilengen geroınniń baǵasy shamamen 300 myń AQSh dollaryna teń.
Derek boıynsha qylmystyq is qozǵalyp, tergeý júrip jatyr.
Avtory: Mıras Qýandyqov