Ózbekstannan qashyp ketken qylmysker Petropavlda ustaldy
PETROPAVL. QazAqparat - Soltústik Qazaqstan oblysynda qaraqshylyq shabýyl jáne tonaý jasaǵany úshin izdeý jarııalanǵan 30 jastaǵy Ózbekstan azamaty ustaldy, dep habarlaıdy «QazAqparat» HAA tilshisi SQO ІІD baspasóz qyzmetine silteme jasap.
Mereke kúnderi qarsańynda soltústikqazaqstandyq polıtseıler oblys aýmaǵyna reıd júrgizýde. Ol úshin myńǵa jýyq qyzmetker men 160 dana avtokólik jumyldyryldy.
«Kóshi-qon jáne krımınaldy polıtsııa qyzmetkerleri qaraqshylyq shabýyl jáne tonaý úshin izdeýde júrgen 30 jastaǵy Ózbekstan azamatyn ustady. 2009 jyly Shyrshyq qalasy sotynyń úkimimen ol aýyr qylmys jasaýda aıypty dep tanylǵan jáne oǵan 13 jylǵa deıin bas bostandyǵynan aıyrý jazasy taǵaıyndalǵan. 2014 jyly jazanyń ótelmegen bóligi túzeý jumystaryna aýystyrylyp, eńbekaqynyń 20% memleket paıdasyna aýdarylyp turýy tıis edi. Biraq, sottalýshy jasyrynyp, el aýmaǵynan shyǵyp ketken. Qylmysker tranzıttik jolaýshylar qujattaryn tekserý barysynda anyqtaldy jáne Petropavl qalasynyń ýaqytsha ustaý oqshaýlaǵyshyna qamaldy», - dep habarlady SQO ІІD baspasóz qyzmeti.
Sonymen birge, mekeme buryn jasalǵan 7 qylmystyń ashylǵanyn habarlady. Іzdeý jarııalanǵan 13 qylmysker ustaldy, onyń 8-i birneshe jyl boıy jasyrynyp kelgen. Qazaqstanǵa kelý erejelerin buzǵan 39 azamat anyqtaldy. Olardyń barlyǵy TMD azamattary.
