Ózbekstannan elge zańsyz ákeline jatqan 450 kg lımon keri qaıtaryldy
Ótken jyldyń jeltoqsan aıynda elimizge Ózbekstan Respýblıkasynan qol júgi arqyly zańsyz jolmen 600 kg anar, 450 kg lımon, 430 kg qurma, 57 kg ártúrli jemis ónimderi ótkizilmek bolǵan. QR Aýyl sharýashylyǵy mınıstrliginiń ósimdikter karantıni jónindegi memlekettik ınspektorlary tez arada bul jemisterdi tárkilep, keri qaıtardy. Aıyptylar ákimshilik jaýapkershilikke tartyldy.
«Sonymen qatar, ótken jyldyń jeltoqsan aıynda Túrkistan, Aqmola, Atyraý, Pavlodar, Soltústik Qazaqstan jáne Qostanaı oblystarynyń ósimdikter karantıni jónindegi memlekettik ınspektorlary Ózbekstan, Tájikstan, Túrkimenstan jáne RF-nan qaýipti ósimdik ónimderin zańsyz kirgizý boıynsha 20 fakti tirkep, tıisti shara qoldanyp aıyppul salǵan. Budan bólek, memlekettik ınspektorlar fıtosanıtarlyq sertıfıkattary bolmaǵan jáne tańbalanbaǵan 17 tonnadan astam júzim, 16,2 tonna qyzylsha, 1,3 tonna alma jáne 24 kg gúl tuqymdaryn el shekarasyna kirgizbedi. Tájikstan jáne Túrkimenstan elderinen ákelingen 20 tonna keptirilgen jemis jáne 20 tonna qyzanaqqa Eýrazııalyq ekonomıkalyq odaq (EAEO) fıtosanıtarlyq talaptaryna sáıkes bolmaýyna baılanysty ruqsat berilmese, RF-nan fıtosanıtarlyq sertıfıkatynyń joqtyǵy men tańbalanbaǵandary úshin 20 tonna bıdaı, 2,7 tonna asqabaq, 40 tonna kartop el shekarasynan óte almady» delingen habarlamada.
Taǵy bir aıta ketetin jaıt, ınspektorlar Reseıden «Jataǵan ýkekire» (qyzǵylt) ósimdik zııankesi juqqan 76 tonna bıdaıdyń Qazaqstanǵa kirýine jol bermedi. «Jataǵan ýkekire» - eń zııandy jáne joıý qıyn aramshópterdiń qataryna kiredi. Osy sebepti álemniń kóptegen elderinde ol qaýipti karantındik obektiler tizimine engizilgen.
Joǵaryda atalǵan faktiler boıynsha tolyq tekserý júrgizilip, ósimdikter karantıni salasyndaǵy ulttyq zańnamalardyń talaptaryna sáıkes júkter keri qaıtarylyp, aıypty tulǵalar ákimshilik jaýapkershilikke tartyldy.
