Ózbekstannan 62 tonna qaýyndy kontrabandalyq jolmen elge jetkizbek bolǵandar ustaldy

NUR-SULTAN. QazAqparat - Túrkistan oblysy boıynsha Memlekettik kirister departamentiniń «Qaplanbek» keden beketinde qaýyndy kontrabandalyq jolmen ákelmek bolǵandardyń jolyn kesti, dep habarlaıdy QazAqparat QR QM Memlekettik kirister komıtetiniń baspasóz qyzmetine silteme jasap.

QR Qarjy mınıstrligi Memlekettik kirister komıteti kedendik baqylaýdy júrgizý kezinde kólik quraldarynda taýarlardy qarap tekserýge múmkindik beretin ınspektsııalyq tekserip-qaraý keshenderin sátti qoldanady jáne kedendik deklaratsııalarda málimdelgen taýarlar týraly málimetterde alshaqtyq bolǵan kezde naqtylanǵan kedendik jete tekserýdi júrgizedi.

Máselen, 2022 jylǵy 23 tamyzda «Qaplanbek» keden beketinde komıtettiń Ahýaldyq ortalyǵynyń qyzmetkerleri ınspektsııalyq tekserip-qaraý kesheniniń sýretterin taldaý kezinde málimdelgen qujattardan sáıkessizdik anyqtady.

Qujattarda málimdelgen «qarbyzdyń» ornyna sýrette sopaqsha pishindes taýar kórindi. Komıtettiń 2021 jylǵy 12 qarashadaǵy №722 buıryǵymen bekitilgen «Memlekettik kirister organdary laýazymdy tulǵalarynyń tekserip qaraý ıntroskopııalyq tehnıkasyn qoldanýy tártibine» sáıkes, MKK-niń Ahýaldyq ortalyǵy keden zańnamasyn buzýǵa kúdik týyndaǵan málimetterdi kedendik jete tekserýge jiberdi.

Kedendik jete tekserýdi júrgizý kezinde (Ahýaldyq ortalyqtyń beıne súıemeldeýi) «Qaplanbek» keden beketiniń qyzmetkerleri 62 tonna deklaratsııalanbaǵan «qaýyn» taýaryn anyqtady. Syrtqy ekonomıkalyq qyzmetke qatysýshy 12 tonna «qaýyn» taýaryn jáne 66 tonna «qarbyz» taýaryn málimdegen.

Kedendik tólemderdi tóleýden jaltarý maqsatynda ımporttaýshylar deklaratsııalarda neǵurlym arzan taýardy málimdeıdi.

«Anyqtalǵan buzýshylyqtar boıynsha syrtqy ekonomıkalyq qyzmetke qatysýshy qoldanystaǵy zańnamamen jaýapqa tartylatyn bolady. QR QM Memlekettik kirister komıteti bıznes-qaýymdastyqty qoldanystaǵy keden zańnamasyn múltiksiz saqtaýǵa shaqyrady»,-delingen habarlamada.

Foto : gov.kz