Ózbekstanmen transshekaralyq yntymaqtastyqty damytý nátıje beredi – Erkin Tuqymov

ASTANA. KAZINFORM – Ózbekstan Respýblıkasynyń Prezıdenti Shavkat Mırzıeevtiń elimizge memlekettik sapary aıasynda qazaq-ózbek sarapshylary Astanada bas qosty.

Sondaı-aq, atalǵan kezdesý Ortalyq Azııa memleketteri basshylarynyń 6-shy Konsýltatıvtik kezdesýi qarsańynda uıymdastyrylyp otyr. 

«Qazaqstan men Ózbekstan prezıdentteri 2022 jyldyń jeltoqsanynda odaqtastyq qatynastar týraly kelisimge qol qoıdy. Biz saraptamalyq keńeste elderimizdiń basshylyǵyna odaqtastyq qatynastarymyzdyń bolashaǵyn anyqtaýǵa kómektesýimiz kerek. Qazaqstan men Ózbekstannyń qarym-qatynasy 5, 10, 50 jyldan keıin qandaı bolady? Budan eki eldiń azamattary ne utady? Odaqtastyq qatynastar degenimiz ne? Bizdiń elderimizdiń qarym-qatynasy Ortalyq Azııa aımaǵynyń ıntegratsııasyna qalaı áser etedi?», - dedi Qazaqstan Respýblıkasynyń Prezıdenti janyndaǵy Qazaqstannyń strategııalyq zertteýler ınstıtýtynda dırektory Erkin Tuqymov. 

Instıtýt basshysy shekaralyq baqylaý rásimderin jeńildetý arqyly transshekaralyq yntymaqtastyqty damytý múmkindigin alǵa tartty. 

«Eki el azamattary shekaradan ótýi nege ońaılatylǵan qujat aınalymyna kóshpeske. Tashkent – Shymkent, Tashkent – Taraz, Tashkent – Almaty, keleshekte Tashkent – Astana júrdek poıyz baǵyttaryn iske qossaq. Transshekaralyq yntymaqtastyqty damytý nátıje beredi jáne basqa aspektilerdi de jandandyra túsedi», - deıdi ol. 

Odan bólek, QSZI basshysy Ózbekstan Respýblıkasynyń Prezıdenti janyndaǵy Strategııalyq jáne aımaqaralyq zertteýler ınstıtýtymen eki eldiń ózara is-qımyl máselelerin jeke qarastyryp, birlesken zertteýler júrgizýdi usyndy.

Eske sala keteıik, 7-8 tamyz kúnderi Ózbekstan Respýblıkasynyń Prezıdenti Shavkat Mırzıeevtiń elimizge memlekettik sapary bolady. 

9 tamyz kúni Astanada Ortalyq Azııa memleketteri basshylarynyń altynshy konsýltatıvtik kezdesýi ótedi.