Ózbekstanmen sý obektilerin birlesip basqarý kelisimi mátininiń 80 paıyzy kelisildi
NUR-SULTAN. QazAqparat - Ózbekstanmen transshekaralyq sý obektilerin birlesip basqarý kelisim jobasy mátininiń 80 paıyzy kelisildi.
Bul týraly Májilis depýtatynyń resmı saýalyna berilgen QR Premer-Mınıstr Asqar Mamınniń jaýabynda aıtylǵan, dep habarlaıdy QazAqparat tilshisi.
«Memleketaralyq kózderdiń sý resýrstaryn paıdalaný men qorǵaýdy birlesip basqarý salasyndaǵy yntymaqtastyq týraly» 1992 jylǵy 18 aqpandaǵy Qazaqstan Respýblıkasy, Qyrǵyz Respýblıkasy, Ózbekstan Respýblıkasy, Tájikstan Respýblıkasy jáne Túrikmenstan arasyndaǵy kelisim Amýdarııa jáne Syrdarııa ózenderi basseıniniń shektes memleketterimen sý salasyndaǵy yntymaqtastyq jónindegi negizgi qujat bolyp tabylady. Osy Kelisimniń erejesine sáıkes árbir tarap óz aýmaǵynda basqa taraptardyń múddelerin qozǵaıtyn jáne olarǵa zalal keltirýge, sý shyǵystarynyń kelisilgen shamalaryn ózgertýge jáne sý kózderiniń lastanýyna ákep soǵatyn is-áreketterge jol bermeýge, sondaı-aq sý resýrstaryn paıdalaný jáne qorǵaýdyń kelisilgen tártibi men belgilengen qaǵıdalaryn qatań saqtaýǵa mindettenedi», - dedi Premer-Mınıstr.
Asqar Mamınniń atap ótýinshe, tótenshe jaǵdaılar josparynda Qazaqstan úshin qaýipsizdiktiń barynsha yqtımal qateri Ózbekstan Respýblıkasynan týyndaıtynyn eskere otyryp, taraptar Qazaqstan Respýblıkasynyń Úkimeti men Ózbekstan Respýblıkasynyń Úkimeti arasyndaǵy transshekaralyq sý obektilerin birlesip basqarý, paıdalaný jáne qorǵaý týraly kelisim jobasyn (budan ári – Kelisim jobasy) ázirleý jáne oǵan qol qoıý týraly ýaǵdalastyqqa qol jetkizgen.
«Qazirgi ýaqytta pysyqtaý barysynda ózbek tarapymen kelisim jobasy mátininiń 80 paıyzy kelisildi. Kelisim jobasyna qol qoıý jónindegi is-shara Jol kartasynda kórsetilgen. Budan basqa tabıǵı jáne tehnogendik sıpattaǵy transshekaralyq tótenshe jaǵdaılardyń týyndaýyna jol bermeý, tótenshe jaǵdaılardy joıý boıynsha tıisti sharalardy jedel qabyldaý maqsatynda dıplomatııalyq arnalar arqyly Ózbekstan Respýblıkasynyń Tótenshe jaǵdaılar mınıstrligine memleketterimizdiń shekaralas oblystarynyń tótenshe qyzmetteriniń ózara isqımyl jasaý qajettiligi týraly hat joldandy», - dedi Úkimet basshysy.
