Ózbekstanmen shekaralas Maqtaaral stansysynyń jabylýy halyqqa qıyn soǵyp tur - Q. Aıtahanov
ASTANA. Qańtardyń 15-i. QazAqparat /Qanat Mámetqazyuly/ - Ózbekstanmen shekaralas Maqtaaral stansysynyń jabylýy halyqqa qıyn soǵyp tur.
Búgin QR Parlamenti Senatynyń jalpy otyrysynda Úkimet basshysynyń atyna depýtattyq saýal joldaǵan senator Qýanysh Aıtahanov osylaı málim etti, dep habarlaıdy QazAqparat.
«Elimizdiń ońtústiginde ornalasqan Maqtaaral aýdany barlyq jaǵynan Ózbekstan memleketimen shektesedi. Sondyqtan da aýdan óz elimizben tek Elbasynyń tapsyrmasymen Syrdarııa ózenine salynǵan Dostyq kópiri arqyly ǵana qatysa alady. 300 myńnan astam halyq bar osy aýdanda respýblıkadan eksportqa shyǵarylatyn maqtanyń 70-75 paıyzy óndiriledi. Qazirgi kezge deıin aýdanǵa keletin jáne aýdan kóleminen shyǵatyn ártúrli taýarlar men júkter Ózbekstan aýmaǵy arqyly ótetin temirjol jelisi arqyly atqarylyp kelip edi. Alaıda, Qazaqstan men Ózbekstannyń memlekettik shekaralaryndaǵy ótkizý beketteri týraly Qazaqstan jáne Ózbekstan Úkimetteri arasyndaǵy kelisimge jáne osy kelisimge sáıkes 2006 jyly qyrkúıekte jasalǵan hattamadaǵy temirjol ótkizý beketteri tizbesine jumys istep turǵan Maqtaaral stansysy enbeı qalǵan. Osyǵan baılanysty 2009 jylǵy qarashanyń 30-nan beri elimizdiń shekara qyzmetkerleri atalǵan temirjol qatynasyn jaýyp tastaǵan», dedi senator.
Onyń aıtýynsha, temirjol qatynasynyń jabylýy saldarynan aýdanda ondaǵan myń tonna maqta talshyǵy eksportqa shyǵarylmaı otyr. Budan basqa, aýdan halqyna qajetti azyq-túlik, otyn, qurylys, janar-jaǵarmaı jáne t.b. kerekti materıaldardy jetkizý úlken qıynshylyqtar týdyrǵan. Bul kópshilik halyqtyń narazylyǵyna ákep otyrǵan kórinedi. «Máseleni sheshý úshin Qazaqstan Respýblıkasy men Ózbekstan Respýblıkasy Úkimetteriniń arasyndaǵy memlekettik shekaralyq ótkizý beketi týraly kelisimde jáne hattamada bekitilgen temirjol ótkizý beketteri tizimine Maqtaaral temirjol stansysyn engizý kerek. Bunymen qosa, osy shekaralyq temirjol stansysyn tıisti ınfraqurylym qyzmetterimen qamtamasyz etý tezirek sheshimin tapsa ıgi», degen senator Úkimet basshysynan problemaǵa qatysty kómek berýdi surady.
