Ózbekstanmen shekaralas aýdanda jańa jumys oryndary ashylýda
KELES. QazAqparat – Túrkistan oblysynda eki jyl buryn bólinip shyqqan Keles aýdany óz aldyna otaý qurǵaly qarqyndy damyp keledi. Ózbekstanmen shekaralas aýdanda jańa mekemeler ashylyp, jumys oryndary ashylýda, dep habarlaıdy QazAqparat tilshisi.
Túrkistan oblysynyń ákimi Ómirzaq Shókeev atalǵan aýdanynyń damý jumystarymen tanysyp, basym baǵyttyń biri qarqyndy ındýstrıalızatsııaǵa berilgenine kóz jetkizdi. Aımaq basshysy jumys saparyn aýdan aýmaǵynan kesip ótetin respýblıkalyq mańyzy bar «Jyzzaq – Gagarın – Jetisaı – Asyqata – Qyzylásker – Saryaǵash – Jibek joly» avtomobıl jolynyń máselesin anyqtaýdan bastady.
Ótken jyly bastalǵan qurylys jumystary búginde toqtap qalǵan. Oblys basshysy máseleni shuǵyl sheship, qurylys jumystaryn jandandyrýdy tapsyrdy. Aýdan ákimi Aqmentaı Esbaev qosymsha oblystyq mańyzy bar Abaı – Oshaqty – Birlik – Shardara avtojolyna tolyqtaı jóndeý jumystary júretindigin baıandady.
Óńir basshysynyń aýdanǵa jasaǵan sapary «Aýyl – El besigi» baǵdarlamasy aıasynda atqarylǵan jumystarmen tanysýmen jalǵasty. Ótken jyly baǵdarlama aıasynda 25 nysan jóndeýden ótip, jańartylǵan. Abaı aýylyndaǵy ishki kóshelermen qatar, aýdandyq «Mádenıet úıi» men ortalyq sport alańynyń qurylysy qatar júrgen. Ómirzaq Estaıuly Abaı aýylynyń ortasynan qıyp ótetin respýblıkalyq joldy qaıta qurylymdap, 4 jolaqty etip keńeıtýdi júktedi.
Jumys sapary barysynda oblys basshysy jalpy quny 7 mlrd 174 mln teńgeni quraıtyn Keles aýdanyndaǵy «Qyzylásker» qosalqy stansasynyń qurylysy» nysanynda boldy. Eki jyl buryn bastalǵan nysan qurylysyn bıylǵy jyldyń tamyz aıynda tolyq aıaqtaý josparlanǵan.
Búginde qosalqy stansanyń qurylysy aıaqtalyp, avtotransformatorlardy jelige qosý jumystary júrgizilýde. Elektr stansasy iske qosylǵan sátte, osy aýmaqtaǵy 4 aýdannyń halqy sapaly elektr qýatyn paıdalanatyn bolady.
