Ózbekstanmen shekaralas aýdanda aınalma jol salynady
KELES. QazAqparat – Túrkistan oblysyndaǵy Ózbekstanmen shekaralas Keles aýdanynda aınalma jol salynady, dep habarlaıdy QazAqparat tilshisi.
Aýdan ákimdiginiń málimetinshe, Abaı aýylynan ótetinin Respýblıkalyq maǵyzy bar A-15 avtojoly mańyndaǵy keptelis búgingi tańda birqatar qolaısyzdyqtar týǵyzýda. Halyq sany 600 myńǵa jýyq kórshiles aýdandar úshin de úlken máseleleriniń biri bolyp tur.
Atalǵan problemany sheshý úshin jol jıegi keńeıtilip, baǵdarsham ornatylǵanymen nátıje shyqpady. Sebebi, atalǵan jol táýligine 3 myń – 5 myń kólik ótýge ǵana arnalyp soǵylǵan. Al, búgingi kúni munda kúnine 27 – 30 myń kólik ótýde. Endigi jerde respýblıkalyq trassa janynan aýdan ortalyǵyna kiretin janama jol salý úshin jumystar júrgizilýde. Tıisinshe atalǵan qurylys basty trassaǵa aýdan ishinen tikeleı kólikter qosylmaı, janama jol arqyly avtobeket mańynan óte qosylady.
Sonymen qatar aýdan ortalyǵynan Respýblıkalyq trassaǵa qosylatyn 6 kóshede de osy janama jolǵa qosylyp, tıisti mekenine keptelissiz jetedi. Jol qurylysy úshin tıisti jerdi qaraý barysynda, jol jıegine túsken kásipkerlik nysandardy kóshirý jumystary basty nazarǵa alynǵan. Tıisti zańnamaǵa sáıkes 14 kásipkerlik qurylys nysany basqa aýmaqqa kóshiriletin boldy.
Bul rette ákimdik pen aýdandyq tıisti aýmaqtyq máslıhat depýtattary, aýdandyq «Nur Otan» parııasy tarapynan aldyn ala eskertý berilip, kásipkerlermen kezdesýler uıymdastyrylǵan. Nátıjesinde zańsyz salynǵan qurylys nysandary buzylyp, qaıtadan jóndeý jumystary júrgizilýde.
