Ózbekstanmen shekaradaǵy beketterde KVI taralýynyń aldyn alý sharalary qolǵa alynǵan
TÚRKІSTAN. QazAqparat – Sybaılas jemqorlyqqa qarsy is-qımyl agenttiginiń janynan qurylǵan Respýblıkalyq «Adaldyq alańy» jobalyq keńse jetekshisi Tólegen Baıǵulov Saryaǵash aýdanyna qarasty «Qazyǵurt» jáne «Jibek joly» keden beketterinde bolyp, keshendi monıtorıng jumystaryn júrgizdi. Respýblıkalyq keńse jetekshisi keden beketterinde júrip jatqan búgingi jumystarmen tanysyp, jolaýshylarǵa qolaıly orta qalyptastyrý baǵytyndaǵy sharalardy jalǵastyrý kerektigin atap ótti, habarlaıdy QazAqparat tilshisi.
Monıtorıngtik toptyń quramynda QR Sybaılas jemqorlyqqa qarsy is-qımyl agenttiginiń Túrkistan oblysy boıynsha departamenti basshysynyń birinshi orynbasary Mıras Qarǵabaı men Saryaǵash aımaǵy boıynsha aýdanaralyq basqarmasynyń basshysy Sapar Jantóreev boldy. Sondaı-aq, oblystyq memlekettik kirister departamentiniń ókilderi men atalǵan keden beketteriniń basshylary, Saryaǵash aýdany ákiminiń orynbasary Smaıl Tasqulov pen «Túrkistan - adaldyq alańy» jobalyq keńsesiniń menedjerleri qatysty. Top músheleri aldymen «Qazyǵurt» keden beketine baryp, baqylaý-ótkizý pýnktiniń búgingi jumysymen jiti tanysyp shyqty. Keshendi jumystar barysynda «Qazyǵurt» keden beketiniń basshysy Berik Mergenbaev álemdi alańdatqan indettiń shekara arqyly enýine jol bermeý maqsatynda qatań sharalar qolǵa alynyp jatqanyn baıandap ótti. Shekaralyq ótkizý pýnktterinde dezınfektsııalyq jumystardyń ár eki saǵat saıyn júrgiziletinin jáne osy ýaqytta ótkizý pýnktteri jabylyp, aımaq turǵyndary men qonaqtarynyń qaýipsizdigi úshin júıeli jumystar atqarylyp jatqandyǵyn jetkizdi. Munan soń, jobalyq keńse jetekshisi «Jibek joly» keden beketin aralap kórip, kórshi elden kelýshiler úshin qolaıly jaǵdaılar jasalǵanyn jáne jeńil jáne aýyr júk kólikteri men avtobýs qatynastarynyń da sheshimi tabylǵanyna kóz jetkizdi. Koronavırýs indetimen kúresý úshin keden beketiniń ótkizý pýnktterinde teplovızorlyq beıne-kameralar men qol ólsheýishteri bar ınfraqyzyl kameralar ornatylǵanyn, olar arqyly dene qyzýy kóterilgen adamdy 15 metr qashyqtyqtan tabýǵa múmkindik beretindigimen tanysty. Mamandar aldaǵy ýaqytta da Túrkistan óńirinde «Adaldyq alańy» jobalyq keńsesi aıasynda qoǵamdyq baqylaýdy kúsheıtýge baǵyttalǵan júıeli jumystar áriqaraı óz jalǵasyn tabatynyn aıtyp ótti.
