Ózbekstanmen shekara arqyly ótetin energııa resýrstaryn esepke alý jetildirilmek

ASTANA. QazAqparat – Parlament Májilisi Qazaqstan Úkimeti men Ózbekstan Úkimeti arasyndaǵy kedendik shekara arqyly ótetin energııa resýrstaryn baqylaý týraly kelisimdi ratıfıkatsııalaıtyn zań jobasyn qaraıtyn boldy, dep habarlaıdy QazAqparat tilshisi.

Palatanyń Qarjy jáne bıýdjet komıtetiniń tóraǵasy Marat Qusaıynovtyń aıtýyna qaraǵanda, atalǵan qujat Májiliske 2022 jylǵy 3 qarashadaǵy Úkimettiń № 862 qaýlysy boıynsha engizilgen.

«Osy Kelisim Qazaqstan – Ózbekstan kedendik shekarasy arqyly qubyrjol kóligimen jáne elektr berý jelileri boıynsha ótkiziletin energııa resýrstaryna baqylaýdyń tıimdiligin arttyrýǵa múmkindik beredi.

Halyqaralyq shart sheńberinde eki taraptyń ókilderi ózara qajetti málimetpen almasyp, eki memleket arasyndaǵy kedendik shekara arqyly ótkiziletin energııa resýrstaryn esepke alý aspaptaryna qol jetkizýge jáne olardyń kórsetkishterin alý boıynsha birlesken is-sharalardy júrgizetin bolady.

Qarjy jáne bıýdjet komıteti Zań jobasy boıynsha qorytyndy ázirleýge daıyn», - dedi depýtat.