Halyqaralyq bankterdi tartý básekelestikti arttyrady - Elena Bahmýtova

ALMATY. KAZINFORM – Qazaqstan qarjygerler qaýymdastyǵynyń tóraǵasy Elena Bahmýtova elde jańa sheteldik bankterdiń fılıaldary paıda bolýy múmkindigine qatysty pikir bildirdi.

«Bizde qazirdiń ózinde sheteldik enshiles bankter bar. Halyqaralyq bankterdi tartý bank naryǵyndaǵy básekelestikti arttyrady. Qyzmet kórsetý standarttary men jańa tehnologııalar kóbeıedi. Naryq qatysýshylary qorqatyn jalǵyz nárse – sheteldik bankter men bizdiń otandyq uıymdardyń qyzmeti arasynda retteýshi arbıtraj bolmaıdy. Biz biryńǵaı standartty qadaǵalaýdy, boljamdy retteýdi jaqtaımyz», - dedi ol Almatyda ótip jatqan qarjygerler forýmynda. 

Aıtýynsha, eger durys rettelgen orta men ekonomıkalyq perspektıvalar bolsa, naryqta jańa oıynshylardyń paıda bolýy ábden múmkin.

«Syrtqy orta da mańyzdy. Munda kelý úshin boljamdy geosaıası jaǵdaılar qajet. Bul jaǵynan bizde bári jaqsy. Bálkim, keletin ınstıtýttar tek Qazaqstanǵa emes, Ózbekstanǵa jáne basqa elderge de nazar aýdarar. Qazir biz jańa qarjy ınstıtýttaryn tartý boıynsha Ózbekstanmen básekelespiz», - dep qosty ol.

Qazaqstan qarjygerler qaýymdastyǵynyń tóraǵasy naryq úshin sheteldik bankterdiń sany emes sapasy mańyzdy ekenin tilge tıek etti.

«Sheteldik bankterdiń qansha bolatyny mańyzdy emes. Sheteldik úsh bank bolady dep kútilgen edi, biraq Bereke Bank banki satylyp ketti. Bul bizde bir bank bar degen sóz. Úsh bank nemese odan az bolýy mańyzdy emes, jańa múmkindikterdiń paıda bolýy mańyzdy», - dedi ol.

Buǵan deıin Qarjy naryǵyn retteý jáne damytý agenttiginiń tóraǵasy Mádına Ábilqasymova Qazaqstanǵa shetel bankteri qyzyǵýshylyq tanytyp otyrǵanyn aıtqan bolatyn. 

Al, qazaqstandyq qarjy sarapshysy Rasýl Rysmambetov shetel bankteriniń kelýinen tutynýshy paıda kórýi kerek dep esepteıdi.