Ózbekstanǵa Sheshenstan, Býrıatııa jáne Chývash respýblıkalarynyń basshylary keldi
TAShKENT. KAZINFORM – Ózbekstan premer-mınıstri Abdýlla Arıpov Vladımır Pýtınniń memlekettik sapary aıasynda Tashkentke kelgen Reseı tarapynyń ókilderimen birqatar kezdesýler ótkizdi, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Reseı men Ózbekstan óńirleri keńesiniń alǵashqy otyrysyna qatysý úshin Tashkentke RF Sheshenstan Respýblıkasynyń basshysy Ramzan Kadyrov keldi. Onymen kezdesken Abdýlla Arıpov eki el arasyndaǵy seriktestiktiń strategııalyq mańyzyn sóz etti.
«Bizdiń halyqtar burynnan bir-birine baýyr retinde qaraıdy. Basqasha bolýy múmkin emes. Men Vladımır Pýtın jáne Shavkat Mırzıeevtiń basshylyǵymen ótetin Reseı men Ózbekstan óńirleri keńesiniń otyrysy elder arasyndaǵy áriptestik pen dostyqty odan ári damytýǵa serpin beretinine senim bildiremin», - dep jazdy Ramzan Kadyrov óziniń Telegram arnasynda.
Sonymen qatar Ózbekstannyń premer-mınıstri RF Býrıatııa Respýblıkasynyń basshysy Alekseı Tsydenovpen kezdesip, túrli saladaǵy yntymaqtastyq máselelerin talqylady. A.Tsydenov Abdýlla Arıpovqa Býrıatııanyń ónerkásiptik múmkindikteri, Ýlan-ýde avıakompanııasynda shyǵarylatyn avıatsııalyq tehnıkalar jelisi týraly aqparattarmen bólisti.
Buǵan qosa, Ózbekstan premer-mınıstri RF Chývash Respýblıkasynyń basshysy Oleg Nıkolaevpen de kelissóz júrgizdi. Onyń aıasynda jyl saıyn respýblıkalardyń yntymaqtastyǵy nyǵaıyp kele jatqanyna jáne saýda aınalymynyń artqanyna erekshe nazar aýdaryldy.
Odan keıin Abdýlla Arıpovpen júzdesken Astrahan oblysynyń gýbernatory Igor Babýshkın óńirdiń tranzıttik múmkindikterin tıimdi paıdalanýdy usyndy.
Al Perm ólkesiniń gýbernatory Dmıtrıı Mahonınmen bolǵan kezdesý qorytyndysyna saı, reseılik delegatsııanyń Buhara men Qashqadarııa oblysyna bıznes-mıssııamen barýy týraly ýaǵdalastyqqa qol jetkizildi. Munymen qatar, taraptar Perm ólkesi men Ózbekstannyń Energetıka mınıstrligi arasyndaǵy ónerkásiptik kooperatsııa boıynsha jol kartasyn pysyqtaýǵa nıetti.
Aıta ketsek, keshe Reseı prezıdenti Vladımır Pýtın memlekettik saparmen Ózbekstanǵa keldi.
