Ózbekstanǵa kirip, shyǵýǵa ishinara ruqsat etildi

TAShKENT. QazAqparat – Ózbekstan el aýmaǵyna kirýge jáne shyǵýǵa ishinara ruqsat berdi. Degenmen eldegi karantındik sharalar bıylǵy jyldyń tamyzyna deıin uzartyldy, dep habarlaıdy QazAqparattyń menshikti tilshisi.

Arnaıy respýblıkalyq komıssııanyń sheshimimen sanıtarııalyq-epıdemıologııalyq jaǵdaıy turaqtanǵan eldermen áýe qatynasy qalpyna keltirilmek. Maýsymnan bastap myna toptaǵy tulǵalarǵa Ózbekstanǵa kirýge jáne shyǵýǵa ruqsat etiledi:

- shet elderdiń dıplomatııalyq ókildikteri men konsýldyq mekemeleriniń qyzmetkerleri men olardyń otbasy músheleri;

- ınvestıtsııalyq jobalar sheńberinde Ózbekstan Respýblıkasynda jumys isteıtin sheteldik kompanııalar men basqa da uıymdardyń mamandary;

- emdelýge keletin (ketetin) tulǵalar;

- shetelde jaqyn týystary nemese aýyr naýqas týysy bar adamdar;

- shet memleketterdiń dıplomatııalyq ókildikteri men konsýldyq mekemeleriniń suraýy boıynsha Ózbekstan Respýblıkasy arqyly basqa elderge jiberiletin (tranzıtpen) adamdar;

- Ózbekstan Respýblıkasynda turaqty tirkelgen shetel azamattaryna, azamattyǵy joq el turǵyndaryna, sondaı-aq shet elde tirkelgen Ózbekstan Respýblıkasynyń azamattary.

Sonymen qatar azamattarǵa oqýyn nemese jumysyn jalǵastyrý úshin Ózbekstannan ketýge ruqsat berilgen. Ushyp-qonýdyń barlyǵy sanıtarlyq ereje men normalarǵa sáıkes júrgiziledi.

Arnaıy respýblıkalyq komıssııa áýe reısterin jasyl, sary jáne qyzyl tús arqyly sanattarǵa bóldi.

«Jasyl» reıs sanatyna sanıtarlyq-epıdemıologııalyq jaǵdaıy turaqty elder engen. Koronavırýs juqtyrý jaǵdaıy azaıǵan elder «sary» túspen belgilengen. Al «qyzyl» toptaǵylardyń qatarynda koronavırýs juqtyrý oqıǵasy azaımaı turǵan elder bar.