Ózbekstanǵa kıik berý máselesi tıisti deńgeıde sheshim qabyldaýdy talap etedi — Ekologııa mınıstrligi
ASTANA. KAZINFORM — 22 shildesinde Ózbekstan Respýblıkasy Ekologııa, qorshaǵan ortany qorǵaý jáne klımattyń ózgerýi mınıstrliginiń resmı resýrsynda Ózbekstan men Qazaqstan arasynda kıikti saqtaý salasyndaǵy ózara túsinistik týraly Memorandýmǵa qol qoıýǵa daıyndyq júrip jatqany týraly habarlanǵan. Bul týraly Ekologııa mınıstrligi málim etti.
— Memorandým jobasy jumys tártibimen Qazaqstan tarapyna usynyldy jáne qazirgi ýaqytta qaralý satysynda tur. Osy máseleniń tabıǵatty qorǵaý mańyzdylyǵyn eskere otyryp, Memorandýmnyń mazmuny eki eldiń jaýapty ǵylymı mekemeleri men ýákiletti memlekettik organdaryn tarta otyryp, pysyqtaýdy talap etetinin atap ótken jón. Sonymen qatar, janýarlar dúnıesi ókilderin berý, sondaı-aq memorandým jasasý máseleleri memleketaralyq sanatqa jatady jáne tıisti deńgeıde sheshim qabyldaýdy talap etedi, — delingen habarlamada.
Eske sala keteıik, buǵan deıin Qazaqstan men Ózbekstan kıik popýlıatsııasyn saqtaýǵa baǵyttalǵan berlisken memorandým qabyldaý múmkindigin zerdelep jatqanyn jazǵan edik. Ózbekstan Ekologııa mınıstrliginiń baspasóz qyzmeti qazirgi ýaqytta qos eldiń jaýapty vedomstvolary arasynda kelissóz júrgizip jatqanyn rastaǵan bolatyn. Qujatty bıyl tamyz aıynda qabyldaý josparlanǵan.
Memorandým aıasyndaǵy kelissózderde ózbek tarapy Qazaqstannan shamamen 500 kıik laǵyn alyp, ony óz aýmaǵyna jersindirý bastamasyn kóterdi. Mınıstrliktiń málimetinshe, mamandar aqbókenderdiń Ózbekstan klımatyna beıimdelýin zerttemek.