Ózbekstanǵa qaraı júk vagondarynyń jınaqtalýyna jol bergender jaýapqa tartylady

ASTANA. KAZINFORM – Ózbekstanǵa qaraı júk vagondarynyń jınaqtalýyna jol bergen kompanııanyń laýazymdy tulǵalaryn jaýapqa tartý kerek. Búgin Úkimet otyrysynda Premer-mınıstr Oljas Bektenov «Qazaqstan temir joly» AQ-nyń basqarma tóraǵasy Talǵat Aldybergenovke osyndaı tapsyrma berdi. 

– Ózbekstanǵa qaraı temirjolda júk vagondary jınaqtalyp qalypty. Ózderińiz bilesizder, senbi kúni bul máseleni ózińizben sóılesip, talqyladyq. Qandaı sharalar qabyldanyp jatyr?, - dep surady Úkimet basshysy Talǵat Aldybergenovten. 

Kompanııa basshysynyń aıtýynsha, 7-8 jeltoqsanda Saryaǵash pen Tashkentte Ózbekstan kólik mınıstrimen kezdesý ótkizilgen.

– Nátıjesinde birlesken sheshimder qabyldandy. Birinshi, Ózbekstan jedel shtab qurdy. Ekinshi, Ózbekstanda barlyq ókiletti vedomstvo táýlik boıy jumys rejımine kóshti. Úshinshi, Ózbekstan temir joldary táýligine 1 800 vagon, 35 poıyz, onyń ishinde 250 astyq untaqtaý ónimderi jáne basqa taýarlar bar vagondardy qabyldaıtyn boldy. Qazir jaǵdaı turaqty. Astyq eksportqa ashyq shyǵarylyp jatyr, - dedi ol.

Osy rette Premer-mınıstr bul máseleni tezdetip tolyq sheshý qajettigin eskertti.

– Osyndaı jaǵdaıǵa jol bergen kompanııanyń laýazymdy tulǵalaryn jaýapkershilikke tartyńyzdar. Maǵan baıandańyz, - dep eskertti Úkimet basshysy. 

Aıta keteıik, Mınıstrler kabınetiniń músheleri elimizdiń kólik-tranzıt salasyn damytý men tsıfrlandyrý máselesin talqyǵa salyp jatyr.