Ózbekstanǵa alǵash ret jasandy jańbyr jaýǵyzatyn qurylǵy jetkizildi

ASTANA. KAZINFORM - Navoı oblysynyń Kanımeh aýdanynda qurǵaqshylyq pen sý tapshylyǵymen kúresýge kómektesetin jańa ınnovatsııalyq joba iske qosyldy, dep habarlaıdy Kazinform fermer.uz Telegram-arnasyna silteme jasap. 

Aýdan ákimi Rýslan Rýzaevtyń bastamasymen munda atmosferaǵa áser etetin bulttardyń paıda bolýyna jáne jaýyn-shashynnyń bolýyna yqpal etetin arnaıy tehnıka jetkizildi. 

Bul tehnologııa qazirdiń ózinde qurǵaq klımaty bar elderde qoldanylǵanymen, Ózbekstanda mundaı tájirıbe birinshi ret qolǵa alyndy. 

Joba International Centre of Climate Change Technologies qazaqstandyq kompanııasymen birlesip júzege asyrylýda. Bul sheshim tabıǵı sý kózderine táýeldilikti azaıtyp, jaıylymdardyń jaǵdaıyn jaqsartyp, eginshilik pen mal sharýashylyǵynda ónimdilikti arttyrady dep kútilip otyr. 

Eske sala keteıik, buǵan deıin Reseı Ózbekstanǵa Qazaqstan arqyly eksporttaıtyn gazdyń kólemin 11 mlrd tekshe metrge deıin ulǵaıtýdy josparlap otyrǵanyn jazǵan edik.