Ózbekstanǵa aqsha aýdarymdary 27%-ǵa ósti

ASTANA. KAZINFORM — Ortalyq bank Ózbekstandaǵy jeke tulǵalarǵa shetelden aqsha aýdarymdary týraly derekterdi usyndy. 

2025 jyldyń birinshi jartyjyldyǵynda Ózbekstanǵa shetelden aqsha aýdarymdary ótken jyldyń sáıkes kezeńimen salystyrǵanda 1,8 mlrd dollarǵa nemese 27%-ǵa artyp, 8,2 mlrd dollarǵa jetkeni belgili boldy.

Qarajattyń 6,4 mlrd dollary nemese 78%-y Reseıden, qalǵany Qazaqstan, AQSh, Ońtústik Koreıa, Túrkııa, Ulybrıtanııa, Qyrǵyzstan, Lıtva jáne basqa elderden aýdarylǵan. Ótken jyldyń sáıkes kezeńinde Reseıdiń úlesi shamamen birdeı boldy.

Ortalyq banktiń málimetinshe, 2025 jyldyń qańtar-maýsym aılaryndaǵy aqsha aýdarymdarynyń ósýine eńbek mıgranttary jumys isteıtin dástúrli elderde jumys kúshine suranys pen salystyrmaly túrde joǵary jalaqynyń saqtalýymen qatar ulttyq valıýta baǵamynyń nyǵaıýy áser etti.

— Syrtqy eńbek mıgratsııasynyń geografııasynda ártaraptandyrý protsesteri jalǵasyp jatyr, bul damyǵan elderden Ózbekstanǵa transshekaralyq aqsha aýdarymdary kóleminiń ósýinen kórinedi. Atap aıtqanda, Ulybrıtanııadan transfertter kólemi 2 esege, EO elderinen 41%-ǵa (Irlandııadan — 2,8 ese, Lıtvadan — 79%, Nıderlandydan — 44%, Polshadan 20— %) jáne AQSh-tan 15%-ǵa ósti, — delingen habarlamada.

Jalpy qarajattyń 4,3 mlrd dollary (53%) dástúrli halyqaralyq aqsha aýdarý júıeleri arqyly aýdarylǵan (2024 jyldyń sáıkes kezeńimen salystyrǵanda 22%-ǵa ósti), 3,6 mlrd dollary (44%) tikeleı shetelden jeke tulǵalardyń banktik kartalaryna aýdarylǵan – P2P aýdarymdary (40%-ǵa ósti) jáne 251 mln dollar bank aýdarymy(3%) SWIFT arqyly aýdarylǵan (22%-ǵa azaıǵan).

Sońǵy jarty jylda Ózbekstannan shetelge jóneltilgen aqsha aýdarymdarynyń kólemi ótken jylǵy deńgeıde qalyp, 1,2 mıllıard dollar boldy.
Eske sala keteıik, Reseı, Túrkııa, Ózbekstan: Qazaqstannan qaı elderge kóp aqsha aýdarylatyny týraly jazǵan edik.