Ózbekstanǵa 1 mıllıon doza ózbek-qytaı vaktsınasy jetkizildi
TAShKENT. ÓzA – QazAqparat - Ózbekstan Densaýlyq saqtaý mınıstrligi taǵy 1 mıllıon doza ózbek-qytaı vaktsınasy jetkizilgenin aıtty, dep habarlaıdy QazAqparat ÓzA silteme jasap.
«Qazir ǵana Zhifei Longcom Biopharmaceutical Co. Ltd. kompanııasy tarapynan ózbek-qytaı mamandary birlesip jasaǵan ZF-UZ-VAC2001 vaktsınasynyń 1 mıllıon dozasy ákelindi» delingen habarlamada.
Búgingi kúnge deıin eldegi vaktsınatsııalanǵan 565 myńnan astam adamnyń 46% -y nemese 263 myńnan astamyna dál osy ZF-UZ-VAC2001 vaktsınasy egilgen. Olar qatarynda 148 myńnan astam azamat 65 jastan asqandar.
Ataýly vaktsınanyń alǵashqy 1 mıllıon dozaly partııasy Ózbekstanǵa 27 naýryzda ákelingen edi.
Ózbekstanda 3-kezeńdik klınıkalyq synaqtardan sátti ótken Qytaıdyń «Zhifei Longcom Biopharmaceutical Co. Ltd» kompanııasy men ózbek mamandary birlesip jasaǵan ZF-UZ-VAC 2001 vaktsınasy azamattarǵa úsh ret egilgende olar tolyq vaktsınatsııalanǵan bolyp sanalady.
