Ózbekstandyqtarǵa sheteldik reısterge áýe bıletterin satyp almaýǵa keńes berildi

NUR-SULTAN. QazAqparat - Ózbekstan Respýblıkasynyń Kólik mınıstrligi sheteldik reısterge áýe bıletterin satyp almaýǵa keńes berdi, dep habarlaıdy QazAqparat tilshisi.

Vedomstvonyń atap ótýinshe, koronavırýspen kúres jónindegi arnaıy respýblıkalyq komıssııanyń sheshimine sáıkes, Ózbekstanda karantın sharalary 2020 jyldyń 1 tamyzyna deıin sozylǵan. Buǵan qosa, barlyq shekteý sharalary atalaǵan merzimge deıin tolyq saqtalatyn bolady. Osyǵan baılanysty sheteldik avıakompanııalarǵa arnaıy nota jiberildi. Onda ózbek avıakompanııalaryna ázirshe áýe tasymalyn qaıta bastaýǵa ruqsat berilmegendigi aıtylǵan.

Máselen, koronavırýspen kúres jónindegi arnaıy respýblıkalyq komıssııanyń №29 hattamasyna sáıkes, qazirgi ýaqytta «jasyl», «sary» jáne «qyzyl» reısterdi anyqtaý jumystary júrgzilip jatyr. Bul rette basty nazar koronavırýs ınfektsııasy boıynsha kórsetkish tómen elderge aýdarylady.

Joǵaryda atalǵan faktorlarǵa baılanysty Ózbekstannyń kólik mınıstrligi el azamattaryna áýe bıletterin satyp almaýǵa keńes berip otyr.

«Ózge eldermen aradaǵy áýe qatynasy arnaıy komıssııanyń sheshimimen ǵana ashylatyn bolady. Qazirgi ýaqytta arnaıy komıssııa bekitken charterlik reıster ǵana oryndalyp júr», - dedi ÓR Kólik mınıstrliginiń baspasóz qyzmetinen.

Buǵan deıin Ózbekstan Respýblıasynyń arnaıy respýblıkalyq komıssııasyna shilde-tamyz aılarynda Túrkııa, Reseı, BAÁ jáne Qazaqstanmen turaqty áýe qatynasyn qalpyna keltirý týraly usynys aıtylǵanyn habarlaǵan edik.

ÓR Kólik mınıstrligi baspasóz qyzmetiniń ókili Navrýz Ashýrmýratovtyń aıtýynsha, birinshi kezeńde parıtettik negizdegi turaqty reıster jandanady.

Mıras Qýandyqov