Ózbekstandyqtarǵa Keden odaǵy elderine nasybaı alyp barmaý eskertildi

ASTANA. QazAqparat - Ózbekstan memlekettik keden komıteti Keden odaǵyna múshe elderdiń (Belarýs, Qazaqstan, Reseı) nasybaıǵa tyıym salynǵanyn azamattardyń esine saldy, dep habarlaıdy gazeta.uz .

Temeki men ózge qospalardan turatyn nasybaı Ózbekstan men oǵan kórshiles elderde keńinen taraǵan. Keden odaǵy elderine nasybaıdy alyp kirýge, aınalymǵa jiberýge óndirýge jáne saqtaýǵa tyıym salynǵan.

Ózbekstannyń Memlekettik keden komıtetiniń derekteri boıynsha, 2016 jyly bir ǵana «Tashkent-Mınsk» áýe reısiniń jolaýshylarynan 100 keliden astam nasybaı tárkilengen (43 kedendik zańnamany buzý faktisi boıynsha).

Quqyq buzýshylar barǵan eldiń zańnamasy boıynsha jaýapqa tartylady. Tártipti saqtaı otyryp, jolaýshylar ózin ǵana emes, óz eliniń abyroıyn da qorǵaıdy, delingen Ózbekstan keden mekemesiniń habarlamasynda.