Ózbekstandyqtar SQO-daǵy egin oraǵynda zańsyz jumys istep kelgen

PETROPAVL. QazAqparat – Soltústik Qazaqstan oblysynda jyl basynan sheteldikterdi qabyldaýǵa qatysty kóshi-qon zańnamasyn buzýdyń 750-ge jýyq deregi tirkeldi. Sonyń ishinde 46 adam sheteldik jumys kúshin zańsyz paıdalanǵany úshin ákimshilik jaýapkershilikke tartyldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, Mamlıýt aýdanyndaǵy alqaptardyń birinde jumys istep júrgen Ózbekstan Respýblıkasynyń 18 azamaty anyqtaldy. Olardyń sharýashylyqta jumys isteýine tıisti ruqsat qujattar bolmaǵan. Sheteldikter ákimshilik jaýapkershilikke tartylyp, elderine jiberildi.

Qaıta tekserý barysynda olardyń ekeýiniń qaıta oralyp, eńbek etýge ruqsat resimdemeı, basqa kásiporynǵa jumysqa turǵany anyqtaldy. Olardy elden shyǵarýǵa qatysty materıal ákimshilik sotqa joldandy. Jumys berýshi de QR Ákimshilik quqyq buzýshylyq týraly kodeksiniń 519-baby «Sheteldik jumys kúshin jáne eńbekshi kóship kelýshilerdi Qazaqstan Respýblıkasynyń zańnamasyn buza otyryp tartý» boıynsha jaýapkershilikke tartyldy.

«Oblysta jyl basynan sheteldik jumys kúshin zańsyz paıdalanýdyń 46 faktisi anyqtaldy. Sondaı-aq sheteldikterdi qabyldaıtyn oblys turǵyndary tarapynan kóshi-qon zańnamasy talaptaryn buzýdyń 745 deregi tirkeldi. Esterińizge salamyz: sheteldikterdi qabyldaıtyn tarap 3 jumys kúni ishinde kelgen shetel azamaty týraly ishki ister organdaryn habardar etýi tıis. 1118 sheteldik Qazaqstan Respýblıkasynda bolý erejelerin buzǵan, onyń 65-i elden shyǵaryldy», - dedi SQO PD Kóshi-qon qyzmeti basqarmasynyń bastyǵy Talǵat Ábilov.