Ózbekstandyqtar bes aıda otanyna 4 mlrd dollardan astam aqsha aýdarǵan
TAShKENT. QazAqparat – 2022 jyldyń bes aıynda Ózbekstanǵa aýdarylǵan aqsha kólemi ótken jyldyń sáıkes kezeńimen salystyrǵanda 61%-ǵa artqan, dep habarlaıdy QazAqparat menshikti tilshisi Ózbekstannyń Ortalyq bankine silteme jasap.
Qarjy retteýshisiniń málimetinshe, bes aı ishinde elge 4,19 mlrd dollar somasynda transshekaralyq aýdarymdar túsken.
Bul ótken jyldyń sáıkes kezeńimen salystyrǵanda 1,58 mlrd dollarǵa (61%) kóp.
Valıýta aıyrbastaý operatsııalarynyń kórsetkishteri de kúrt ósken.
2022 jylǵy qańtar-mamyrda bankter halyqtan 4,32 mlrd dollarǵa valıýta satyp alǵan.
Bul ótken jyldyń sáıkes kezeńimen salystyrǵanda 1,6 mlrd dollarǵa nemese 59%-ǵa artyq.
Tek mamyr aıynyń ózinde satyp alý kólemi 1,05 mlrd dollardy qurady.
Bul rette bankter halyqqa 2,8 mlrd dollar satty. Bul ótken jylǵy kórsetkishten 1,7 mlrd dollarǵa nemese 70%-ǵa kóp.
