Ózbekstandyq óz otandastaryn tiri qoıdyń qunynan da tómen baǵaǵa saýdalaǵan - BAQ
ASTANA. 6 naýryz. QazAqparat - Ózbekstandyq óz otandastaryn bordaqylanǵan qoıdyń qunynan da tómen baǵaǵa satyp kelgen, dep jazady «Kazahstanskaıa pravda» gazetiniń tilshisi Anna Vegel «Prodam cheloveka po shodnoı tsene» degen taqyryptaǵy maqalasynda.
35 jastaǵy N. osydan birneshe kún buryn Qaraǵandy oblystyq ІІD uıymdasqan qylmyspen kúres basqarmasynyń qyzmetkerleriniń quryǵyna ilikken.
Oblystyq ishki ister departamenti baspasóz qyzmetiniń habarlaýynsha, N. esimdi azamat 2008 jyldyń aqpanynan beri memleketaralyq izdeýde bolǵan. Ol óz otanynda adam saýdasy syndy qaýipti qylmysqa kináli dep sanalǵan. Atalǵan azamattyń Ózbekstannan gastarbaıterlerdi Jambyl oblysyna jetkizýmen aınalysqandyǵy ári bir adamǵa 300 dollardan alǵandyǵy belgili bolyp otyr. Tutqyndalýshynyń atap ótýinshe, ol osy ýaqyt aralyǵynda bizdiń respýblıkanyń aýmaǵynda, bastapqyda Jambyl oblysynda, keıin Qaraǵandyda jasyrynyp júrgen.
Qazirgi ýaqytta N. oblystyq ІІD-niń ýaqytsha oqshaýlaý abaqtysyna qamaldy. Onyń tutqyndalǵandyǵy týraly aqparat Ózbekstannyń quqyq qorǵaý organdaryna eskertildi.
