Ózbekstandyq qarııa Atyraýda 21 jyl boıy qujatsyz júrgen

ATYRAÝ. QazAqparat – Atyraýda 21 jyl boıy qujatsyz júrgen ózbekstandyq qarııa anyqtaldy. Jeke basy anyqtalǵan soń sheteldik azamat eline qaıtarylady, dep habarlaıdy QazAqparat tilshisi.

Oblystyq polıtsııa departamentiniń baspasóz qyzmetinen málim etkendeı, 20 qańtardan «Mıgrant» jedel-profılaktıkalyq is-sharasy ótip jatyr.

«Atalǵan is-shara kezinde Atyraý qalalyq polıtsııa basqarmasy №2 polıtsııa bóliminiń ýchaskelik polıtsııa ınspektory Nursultan Keńesov qujatsyz júrgen 72 jastaǵy sheteldikti anyqtady. Ózbekstan Respýblıkasynyń azamaty Qazaqstanǵa 2000 jyldary kelgen. Qazaqstandyq áıelmen otbasyn qurǵan. Erli-zaıyptylardyń ortaq bes balasy bar. Sheteldiktiń aıtýynsha, sol jyldary qujat daıyndamaq bolǵan. Biraq, qajetti qujattardy tolyq tapsyra almaǵan», - dep habarlady departamenttiń baspasóz qyzmeti.

Qazir Atyraý qalalyq polıtsııa basqarmasy kóshi-qon qyzmeti bóliminiń qyzmetkerleri qujattardy jınaqtady. Naqtylaı aıtqanda, 1951 jylǵy sheteldiktiń jeke basyn anyqtap, eline qaıtarý úshin tıisti qujattar tizbesin Ózbekstan Respýblıkasynyń Aqtaý qalasyndaǵy konsýldyǵyna joldady.

Eske sala ketelik, Atyraý oblysynda joǵalyp ketken Ózbekstan azamaty tabylǵanyn habarlaǵan bolatynbyz. Ol Reseıden kele jatqan sheteldik kólikten túsip, iz-túzsiz joǵalyp ketken. Azamattyń joǵalǵany týraly habar Maqat aýdandyq polıtsııa bólimine 20 aqpanda saǵat 22:30 shamasynda túsken. Dossor kentindegi polıtsııa bólimshesiniń qyzmetkerleri sheteldik azamatty 21 aqpanda saǵat 2:00 shamasynda tapqan. Ózbekstan Respýblıkasynyń týmasy Maqat aýdanyndaǵy №469 temirjol beketiniń tusynda júrgeni anyqtalǵan.