Ózbekstandyq dárigeler ota arqyly sıam egizderin ajyratyp aldy

TAShKENT. ÝzA-QazAqparat – Ózbekstannyń densaýlyq saqtaý mınıstrliginen málim etkendeı, el medıtsınasy tarıhynda alǵash ret ózbek dárigerleri sıam egizderin óte sırek jasalǵan operatsııa nátıjesinde ajyratyp alǵan. Bul týraly QazAqparat «ÝzA» agenttigine silteme jasap habarlaıdy.

Operatsııa respýblıkalyq perınataldyq ortalyq janyndaǵy neonataldy hırýrgııa oqý-emdik-ádisteme ortalyǵynda 2022 jyldyń 19 jeltoqsanynda jasalǵan. Oǵan professor, osy ortalyq meńgerýshisi Bahtıer Ergashev jetekshilik etken.

«Operatsııa 3 saǵatqa sozyldy. Balalardyń bir-birimen baýyr arqyly qosylǵany dáleldendi. Balalardy ajyratý kezinde baýyrdan jáne basqa qan tamyrlarynan qan ketýdiń aldyn alý úshin ýltradybystyq jáne argon skalpeli jáne Bloodstop dep atalatyn zamanaýı qan toqtatatyn materıaldy qoldandyq. Sonyń saldarynan balalar az qan ketýmen ajyratyp aldyq», - deıdi B. Ergashev.

2022 jyly 31 mamyrda Qyrǵyz Respýblıkasynda dúnıege kelgen sábıler ortalyqqa 5 aılyq kezderinde jetkizilgen. Olardyń jaqyn týystar arasyndaǵy nekeden, ıaǵnı apaly-sińlilerdiń balalarynan týǵany belgili boldy. Bolashaq sábılerdiń jaǵdaıy júktiliktiń 28-aptasynda anyqtalyp, bolashaq ana Oshtan Bishkekke jiberiledi. 29-aptada bosaný protsesi «kesar» ádisimen júrgizilip, salmaǵy 1 600 gramm bolyp ómirge kelgen sábılerge Fatıma jáne Zýhra esimi qoıylady. Egizderdiń qaryn tusy, dálirek aıtqanda baýyry birlese týǵan. Óte qıyn operatsııadan keıin jáne óte náziktiginen sábılerdiń jazylýy birazǵa deıin sozylypty.

«Osyǵan deıin sıam egizderi atanǵan balalardyń jaǵdaıy turaqty dep baǵalanyp otyr. Aldaǵy kúnderi sábıler óz shańyraǵyna oralady degen úmit bar. Bul nátıjege qol jetkizýde kásibı deńgeıde jumys istegen úlken hırýrgııa ujymy basty ról atqardy. Olar ózderiniń biliktiligi, bilimi, tájirıbesi jáne batyldyǵymen ózbek medıtsınasynyń shejiresine taǵy bir úlken tarıhı nátıjeni mórledi», - delingen mınıstrlik habarynda.

Osy tarıhı jaǵdaıdan keıin, ÓR Densaýlyq saqtaý mınıstri Amrıllo Inoıatov operatsııaǵa qatysqan mamandardy «Densaýlyq saqtaý úzdigi» tósbelgisimen jáne qurmet gramotalarymen marapattaǵan.

Aıta ketsek, osy ýaqytqa deıin mundaı tájirıbe túri bul ortalyqta bir-aq ret jasalǵan. Onda operatsııa shetelden shaqyrylǵan mamannyń basshylyǵymen jáne tikeleı qatysýymen júrgizilgen.

Ádette, sıam egizderi 200 myń jaǵdaıda bir ret kezdesedi. Málimetter boıynsha, olardyń kópshiligi óli týady. Tiri týǵandardyń 5 paıyzdan 25 paıyzǵa deıingisi uzaq ómir súrmeıdi.