Ózbekstandyq azamattar Qazaqstan shekarasynan nasybaı salynǵan túıinshekterdi alyp ótpek bolǵan

ASTANA. QazAqparat - Ózbekstannan Qazaqstanǵa qaraı memlekettik shekarany buzyp ótkeni úshin ustalǵan úsh adamnyń biriniń sómkesinen 32 túıinshekke bólip salynǵan nasybaı tabyldy, dep habarlaıdy QR UQK ShQ baspasóz qyzmetinen.

QR UQK Shekara qyzmetiniń «Ońtústik» óńirlik basqarmasyna qarasty «Saryaǵash» shekara otrıadynyń «Dostyq» shekara zastavasynyń shekara narıady 22 qazanda saǵat 00.30 shamasynda tún qarańǵylyǵyn paıdalanyp Ózbekstannan Qazaqstanǵa qaraı memlekettik shekarany buzyp ótken úsh Ózbekstan azamatyn (1978 jyly týǵan bir er adam men 1972, 1977 jyldary týǵan eki áıel adamdy) ustady.

38 jastaǵy Azıza esimdi áıeldiń qol júginen árqaısysy 100 gramdyq, 32 túıinshekke salynǵan nasybaı tabyldy. Memlekettik shekarany buzý dereginiń ózi qylmystyq is ekendigi óz aldyna, ústimizdegi jyldyń 18 sáýirinen bastap, Qazaqstan Respýblıkasynyń «Densaýlyq saqtaý máseleleri boıynsha keıbir zańnamalyq aktilerine ózgerister men tolyqtyrýlar engizý týraly» Zańyna sáıkes, quramynda nıkotın men shaıyrlyq zattary shekten tys kóp temeki ónimderin el aýmaǵyna engizýge, daıyndaýǵa, satýǵa jáne taratýǵa tyıym salynǵan. Onyń ishine nasybaı da bar.

Endi ustalǵan azamattar nasybaı tasymaldaǵany úshin de jaýapqa tartylatyn bolady.