Ózbekstandyq soǵys ardagerlerine 1600 dollar aqshalaı syıaqy beriledi

TAShKENT. KAZINFORM – Ózbekstandyq soǵys ardagerlerine 20 mln sým (ortasha kýrspen $1600) kóleminde birjolǵy aqshalaı syıaqy tólenedi, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Tıisti jarlyqqa Ózbekstan prezıdenti Shavkat Mırzıeev qol qoıdy. Qujatqa saı, soǵysqa qatysýshylar men maıdan saldarynan múgedek bolǵan azamattarǵa 20 mln sým beriledi.

Aıta keteıik, byltyr 9 mamyr qarsańynda ózbekstandyq ardagerlerge 18 mln sým ($1400) tólengen edi. Al 2022 jyly – 15 mln sým ($1100), 2021 jyly 12 mln sým ($940) birjolǵy aqshalaı syıaqy berildi.

Eske sala keteıik, 9 mamyrǵa oraı qazaqstandyq ardagerlerge de birjolǵy áleýmettik kómek tólendi. Bıyl respýblıka boıynsha onyń ortasha mólsheri – 1,5 mln teńge.