Ózbekstandyq «Pahtakor» fýtbol klýbyn satý keıinge shegerildi

TAShKENT. KAZINFORM – Ózbekstannyń Memlekettik aktıvterdi basqarý agenttigi «Pahtakor» fýtbol klýbyn satý rásimin ýaqytsha toqtatty, dep habarlaıdy Kazinform agenttiginiń menshikti tilshisi.

Vedomstvonyń málimetinshe, «Pahtakor fýtbol klýby» jaýapkershiligi shekteýli qoǵamy úlesiniń 100 paıyzyn ashyq saýdaǵa shyǵarý jaıly habarlandyrý 16 qańtarynda agenttiktiń resmı saıtynda jarııalanǵan.

«Osy aralyqta jurtshylyqtyń aıtqan pikirlerin zerdeleı kele, «Pahtakor fýtbol klýby» JShQ-nyń 100 paıyzdyq memlekettik úlesine jarııa saýda protsesteri ýaqytsha toqtatyldy», - dep málim etti agenttikten.

Tashkenttik «Pahtakordy» satý týraly habarlandyrýdan keıin ózbekstandyqtar klýb pen onyń ınfraqurylymyn saqtap qalý máselesin kóterip, alańdaýshylyq bildirgen bolatyn.

«Pahtakor» 1956 jyly qurylǵan. 1972 jyly komanda KSRO-nyń ekinshi satyly chempıonatynda jeńimpaz atandy, al 1968 jyly KSRO Kýbogynyń fınalynda másekeýlik «Torpedodan» 0:1 esebimen utyldy.

«Pahtakor» - Ózbekstannyń 16 dúrkin chempıony, bul rekordtyq kórsetkish. Ol sondaı-aq el kýbogynyń 13 dúrkin ıegeri atanǵan.

Klýb eki ret Azııa chempıondar lıgasynyń jartylaı fınalyna shyqqan.

Eske sala keteıik, buǵan deıin aty ańyzǵa aınalǵan «Pahtakor» fýtbol klýbynyń satylymǵa shyǵarylǵanyn jazyp edik.