Ózbekstandyq muǵalimder oqýshylardy energııa únemdeýge úıretpek

TAShKENT. KAZINFORM — Ózbekstan mektepterine oqýshylardy energetıkalyq saýattylyq negizderine úıretetin baǵdarlama engiziledi, dep habarlaıdy Kazinform agenttiginiń menshikti tilshisi.

Jańa joba týraly «Oʻzbekiston 24» telearnasyna suhbat bergen Mektepke deıingi jáne orta bilim mınıstri Hılola Ýmarova aıtty.

— Bul — ár mektep dırektory, muǵalim men oqýshy úshin óte mańyzdy. Mektepke deıingi jáne orta bilim mınıstrligi Tehnıkalyq retteý agenttigimen birlesip, oqýshylarǵa energııa resýrstarynyń mańyzyn túsindirýge arnalǵan baǵdarlama ázirledi. Ózbekstandyqtarǵa bala kezinen bul baǵytta únemdeýdi úıretý qajet, — dep atap ótti Hılola Ýmarova.

Mınıstrdiń aıtýynsha, atalǵan jumysty júrgizýge jaýapty tulǵalar bekitildi. Tıisinshe, «Tárbıe», «Geografııa» jáne «Fızıka» pánderinde tabıǵı resýrstardy únemdeý mysaldary kórsetilip, oqýshylarǵa onyń mańyzdylyǵy túsindiriledi.

Eske salaıyq, buǵan deıin Ózbekstannyń jalpy ishki ónimin 1 dollarǵa arttyrý úshin 2,5 ese kóp energııa jumsalatynyn jazyp edik.