Ózbekstandyq kompanııalar Qazaqstanda sý únemdeý tehnologııalaryn engizýi múmkin

TAShKENT. KAZINFORM – Ózbekstandyq kompanııalar Qazaqstanda sý únemdeý tehnologııalaryn engizýmen aınalysýy múmkin, dep habarlaıdy Kazinform agenttiginiń menshikti tilshisi.

Bul týraly Tashkentke jumys saparymen kelip, ózbekstandyq áriptesi Shavkat Hamraevpen kezdesken QR Sý resýrstary jáne ırrıgatsııa mınıstri Nurjan Nurjigitov málim etti.

- Ózbekstanda sý únemdeý tehnologııalaryn engizý qarqyndy júrip jatyr. Munda arnaıy aqparattyq-taldaý ortalyǵy bar. Onyń mamandary búgin baıandama jasady. Nátıjesinde ekijaqty kelisimge keldik. Oǵan saı, bizdiń qyzmetkerler naýryzda Ózbekstanǵa kelip, bul taraptyń atqaryp jatqan jumystarymen tanysady. Eger aldaǵy ýaqytta ýaǵdalastyqqa qol jetkizip jatsaq, onda ózbekstandyq kompanııalar Qazaqstanda sý únemdeý tehnologııalaryn engizýmen aınalysýy múmkin, - dep jaýap qatty mınıstr Kazinform tilshisiniń saýalyna.

Aıta keteıik, Ózbekstan arnalardy betondaý arqyly sý shyǵynyn 15 paıyzǵa deıin qysqartty. Bul rette Qazaqstanda da iri jobalar qolǵa alyndy. Vedomstvo basshysynyń aıtýynsha, 2028 jylǵa deıin elimizde 14,5 myń shaqyrymnan astam sýarý júıesine jóndeý júrgiziledi.

- Byltyrdyń ózinde uzyndyǵy 400 shaqyrymnan astam 80 ırrıgatsııalyq júıeni betondadyq. Qazir 1 531 shaqyrym aryqqa osyndaı jóndeý júrgizilip jatyr. Úkimet qaýlysymen 2024-2028 jyldarǵa arnalǵan keshendi jospar bekitildi. Oǵan saı, 2028 jylǵa deıin 14,5 myń shaqyrymnan astam sýarý júıesine jóndeý júrgizemiz. Smetalyq qujattar daıyn, bıyl respýblıkalyq bıýdjetten jáne Islam damý bankinen qarajat bólinedi, - dep túıindedi Nurjan Nurjigitov.

Mınıstrdiń aıtýynsha, Qazaqstan men Ózbekstan sý bólý kelisiminiń jobasyn ázirlep jatyr.

Sonymen qosa, qazirgi ýaqytqa deıin Shardara qoımasyna 4,5 mlrd tekshe metr sý jınaldy. Ótken jyldyń sáıkes kezeńimen salystyrǵanda bul 1,87 mlrd tekshe metrge artyq. Nurjan Nurjigitov sý máselesine qatysty pikir bildire otyryp, «Jaǵdaı byltyrǵydan jaman bolmaıdy», dep sendirdi.

Munymen birge, Qazaqstan men Ózbekstan Syrdarııa boıyna sý esepteıtin qurylǵylar ornatýdy bıyl aıaqtaýdy josparlap otyr.