Ózbekstandyq kásiporyndar aýany lastaıtyn shyǵaryndylardy 2 ese qysqartýǵa mindetteldi

TAShKENT. KAZINFORM — Ózbekstannyń Ekologııa jáne klımattyń ózgerýi ulttyq komıteti ónerkásiptik kásiporyndardan 1 jeltoqsanǵa deıin aýany lastaıtyn shyǵaryndylardy eki ese azaıtýdy talap etti, dep habarlaıdy Kazinform agenttiginiń menshikti tilshisi.

— Bul talapty oryndamaǵan kásiporyndardyń jumysy Ekologııa jáne klımattyń ózgerýi ulttyq komıtetiniń sheshimi boıynsha 10 kúnge deıin toqtatylýy múmkin, — dep málim etti vedomstvodan.

Ekologııalyq talaptardy elemegen kásiporyndarǵa ákimshilik nemese qylmystyq jaza qoldanylýy yqtımal. Atalǵan shara respýblıkanyń iri qalalaryndaǵy aýa sapasynyń nasharlaýyna baılanysty qabyldanyp otyr.

Aıta keteıik, keıingi 10 kúnnen beri Ózbekstan astanasyndaǵy ekologııalyq ahýal kúrdelene tústi. Atap aıtqanda, qamtylyp otyrǵan aralyqta Tashkenttegi aýa sapasy zııandy dep tanyldy.

Tıisinshe, jaýapty vedomstvo bas shahardaǵy sýburqaqtardy qaıta iske qosty. Sonymen qatar, kóshelerge arnaıy kóliktermen sý shashyp, shańdy basý jumysy júrgizilip jatyr.

Buǵan deıin habarlaǵanymyzdaı, Ózbekstannyń iri qalalarynda qorshaǵan ortaǵa zalal keltiretin kásiporyndardy ashýǵa tyıym salynady. Munymen birge, el úkimeti qaladaǵy iri kásiporyndardy shet aımaqtarǵa kóshiredi.

Qosa ketsek, búgin Qazaqstan, Ózbekstan, Qyrǵyzstan jáne Tájikstannyń ekologııa mınıstrleri Samarqandta bas qosyp, Ortalyq Azııadaǵy jabaıy faýna men florany saqtaý jónindegi deklaratsııaǵa qol qoıdy.