Ózbekstandyq delegatsııa Oraldaǵy tálimbaqta kıik ósirý tájirıbesimen tanysty
ORAL. KAZINFORM – Ózbekstan Respýblıkasy Ekologııa, qorshaǵan ortany qorǵaý jáne klımattyń ózgerýi mınıstrliginiń ókilderi Jáńgir han atyndaǵy Batys Qazaqstan agrarlyq-tehnıkalyq ýnıversıtetinde jumys saparymen boldy.
Atalǵan mınıstrlikke qarasty Orman sharýashylyǵy, bıoalýantúrlilik jáne ekotýrızm salasyndaǵy saıasatty iske asyrý departamentiniń basshysy Bahrom Holhýjaev pen Ormandardy jáne erekshe qorǵalatyn tabıǵı aýmaqtardy damytý jáne shóleıttenýge qarsy kúres basqarmasynyń bas mamany Sarvar Ahmedovti ýnıversıtettiń ǵylym jónindegi prorektory Áljan Shámshidin qabyldady.
Budan soń meımandar bilim ordasynyń ǵalymdarymen birge qala shetindegi ýnıversıtetke qarasty «Aqbóken» tálimbaǵyna baryp, qolǵa úıretilgen dala janýarlaryn kózderimen kórip, ondaǵy jumys barysymen tanysty.
Bahrom Holhýjaevtyń sózine qaraǵanda, Ózbekstan úkimeti tarapynan Qaraqalpaqstan Respýblıkasy aýmaǵynda kıikterdiń sanyn kóbeıtý boıynsha mindet qoıylǵan. Osy maqsatta bıyl arnaıy jumys toby quryldy. Aldymen Qaraqalpaqstan jerindegi jergilikti jaǵdaı, ondaǵy qoryqtar men tálimbaqtardyń jaı-kúıi zerttelgen.
- Batys Qazaqstan agrarlyq-tehnıkalyq ýnıversıtetine alǵash ret kelip, kıikterdi tálimbaqta ustaý tájirıbesimen tanystyq. Qaraqalpaqstan jerinde osyndaı tálimbaq qurý josparymyzda bar. Bizde ázirge mundaı tájirıbe joq. Ózbekstanǵa kıikter tabıǵı jolmen ózderi qonystanyp jatyr. Sońǵy málimetterge súıensek, bizde respýblıka boıynsha shamamen 300-deı kıik bar. Olardyń sanyn kóbeıtýge den qoıýdamyz. Osy baǵytta Qazaqstan tarapynan ekologııalyq dáliz qurý týraly másele kóterildi. Muny da aldaǵy ýaqytta jan-jaqty talqylaıtyn bolamyz, – dedi Ózbekstan Ekologııa, qorshaǵan ortany qorǵaý jáne klımattyń ózgerýi mınıstrliginiń ókili B.Holhýjaev.
Jáńgir han ýnıversıtetiniń ǵylym jónindegi prorektory Áljan Smaıylulynyń aıtýynsha, bul jobaǵa buǵan deıin Ázerbaıjan men Qytaı elderi de qyzyǵýshylyq tanytqan. Al Ózbekstan memleketine jasaǵan ǵylymı sapary barysynda ondaǵy mamandar BQATÝ-dyń osy tájirıbesine erekshe nazar aýdarǵan eken.
Eske sala keteıik, budan buryn qazaq ǵalymdarynyń kıikti arnaıy tálimbaqta ósirip, zerttep jatqanyn jazǵan edik.