Ózbekstandyq boksshy Jánibek Álimhanulymen jekpe-jekke daıyn ekenin málimdedi

ASTANA. KAZINFORM – Ózbekstannan shyqqan burynǵy álem chempıony Israıl Madrımov (10-2-1, 7 KO) qazaqstandyq kásipqoı boksshy, orta salmaqtaǵy IBF jáne WBO belbeýleriniń ıegeri Jánibek Álimhanulymen (17-0, 12 KO) jekpe-jek ótkizýge qarsy emes ekenin aıtty, dep habarlaıdy Sports.kz.

— Eger men 160 fýnt salmaq dárejesine kóterilsem, barlyq chempıondarmen kezdesýge kúsh salamyn.

Jánibekke aıryqsha qurmetpen qaraımyn, bul jerde jeke eshteńe joq. Munyń bári tek sportqa qatysty ári men Jánibekpen judyryqtasýǵa qýana keliser edim. Bul – men úshin mártebe.

Qazaqstan – Ózbekstanǵa kórshi el, bul eki myqty boks ulty arasyndaǵy tamasha kezdesý bolar edi, – dedi Madrımov The Ring basylymyna bergen suhbatynda.

Aıta keteıik, Jánibek Álimhanuly orta salmaqtaǵy IBF jáne WBO nusqalary boıynsha álem chempıony ataǵyna ıe.

Buǵan deıin ırlandııalyq boksshy Jánibek Álimhanulyn jekpe-jekke shaqyrǵan bolatyn.