Ózbekstandaǵy QR Elshiliginde daýys berý belsendi júrip jatyr
TAShKENT. QazAqparat - Ózbekstandaǵy QR Elshiliginde Qazaqstan Parlamenti Májilisine daýys berý belsendi júrýde.
Belgilengen tártipke sáıkes №217 saılaý ýchaskesi ÓR-daǵy QR Elshiliginde jergilikti ýaqyt boıynsha saǵat 06.00-de ashyldy jáne 07.00-den bastap Ózbekstan aýmaǵynda turatyn Qazaqstan azamattary daýys bere bastady.
Saılaý ýchaskesi komıssııasynyń tóraǵasy Naýryz Aıdarov agenttikke bergen suhbatynda habarlaǵandaı, búgingi elshilikte konsýldyq eseptegi Qazaqstan azamattary belsendi túrde daýys berýdi bastady. «Saılaýǵa úlken daıyndyq júrdi. Qyzmetkerler óńirlerge shyǵyp, azamattarmen kezdesti, saılaýǵa qatysýǵa shaqyrdy», - dep málimdedi dıplomat.
Budan basqa, tapsyrys hattarmen óńirdegi QR azamattaryna shaqyrtý jiberildi. Ózbekstannyń ortalyq baspa basylymdarynda QR Prezıdentiniń saılaý týraly habarlandyrýy jarııalandy, dep atap ótti ol.
QR Ortalyq saılaý komıssııasynyń materıaldary, bıýlleten toltyrý tártibi, aqparattar tıisti úlgide qabyrǵaǵa ilindi. «Daýystardy esepteý 20.00-de daýys berý rásimi aıaqtalǵannan keıin júzege asyrylady, zańǵa sáıkes hattama elshilik stendine ilinedi», - dep sózin túıindedi komıssııa tóraǵasy.
