Ózbekstandaǵy Qazaqstan jyly: Tashkentte Maqpal Júnisova jeke kontsert beredi
NUR-SULTAN. QazAqparat - «Qazaqkontsert» memlekettik kontserttik uıymynyń óner ujymdary el óńirlerine keremet tartý jasamaq, dep habarlaıdy QazAqparat.
60 jyldyq tarıhy bar «Qazaqkontsert» uıymynyń «Astana sazy» jáne «Saz&soul» ansamblderi halyq súıip tyńdaıtyn tańdaýly týyndylar men jańa shyǵarmalardan turatyn «Qazaqkontsert shaqyrady» kontsertin usynady. Eki ansambldiń birlesken kontsertine elimizdiń talantty mýltı ınstrýmentalıst mýzykanttary, qazaq mýzykasynyń damýyna jańasha lep ákelgen kompozıtorlar Baýyrjan Aqtaev pen Ádiljan Tolyqpaev jetekshilik etedi.
«Qazaqkontsert» ujymdary qazaqtyń dástúrli mýzykasy men estrada óneri sheber úılesim tapqan, Uly dalanyń kóne mýzykalyq saryndary zamanaýı jańa formatta jańǵyratyn erekshe kontsertti usynady.
Kontsertte halyq ánderi, Qurmanǵazy, Aqan seri, Jaıaý Musa, N.Tilendıev, J.Jabaev, K.Ázirbaev, A.Qorazbaevtyń belgili kompozıtsııalary jańa formatta oryndalady. Qos ansamblmen birge sahnada Qazaqkontsert solısteri Erbolat Shaldybekov jáne Qaırat Sarybaev óner kórsetpek. Óner súıer qaýym qazaq mýzykasynyń ulylyǵyn, Uly Dalamyzdyń keńdigin pash etetin sazdy áýenderdi tyńdaı alady.
Óner ıelerin alǵash bolyp Almaty qalasynyń jurtshylyǵy qarsy alady. Almaty qalasyndaǵy kontsert 2 qarasha kúni Qurmanǵazy atyndaǵy Qazaq memlekettik akademııalyq halyq aspaptar orkestriniń kontsert zalynda ótedi. Odan keıin gastroldik kerýen Shymkent qalasynda jalǵasyn tabady. Shymkent qalasynyń óner súıer qaýymy «Qazaqkontsert shaqyrady» kontsertin 4 qarasha kúni Shámshi Qaldaıaqov atyndaǵy oblystyq fılarmonııada tamashalaı alady.
«Ónerdiń ozyq úlgilerin halyqqa qoljetimdi etý maqsatynda «Qazaqkontsert shaqyrady» kontserti tegin ótkiziledi. Buǵan qosa, kontsert kórermenderge tek rýhanı azyq syılap qana qoımaı, kásibı jas mýzykanttarǵa da jaqsy tálimgerlik úlgi bolmaq. Qazaqkontserttiń respýblıka óńirlerindegi gastroldik sapary halyqaralyq gastrolderge jalǵaspaq. QR Mádenıet jáne sport mınıstrliginiń qoldaýymen ótetin osy úlken gastroldik sapardyń sońǵy núktesi – Tashkent qalasy», - dedi «Qazaqkontsert» uıymynyń dırektory Jeńis Seıdýllauly.
Ózbekstandaǵy Qazaqstan jyly aıasynda Tashkent qalasynyń kórermenderin Qazaqkontsert solısi, Qazaqstannyń halyq ártisi Maqpal Júnisova jáne «Astana sazy» men «Saz&soul» ansamblderi óz ónerimen qýantpaq.
