Ózbekstandaǵy qazaq balýany Olımpıadaǵa joldama aldy
ASTANA. QazAqparat - Mońǵolııa eliniń astanasy Ýlan-Batorda kúres túrlerinen Olımpıada joldamasyn taratatyn halyqaralyq týrnır bastaldy. Jarystyń birinshi kúni boz kilemge grek-rım kúresiniń sheberleri shyqty, dep habarlady massaget.kz.
Qazaqstan quramasy sapynda Ýlan-Batorǵa 6 balýan attanǵan bolatyn. Olardyń úsheýi jarys jolyna shyqqan edi. Alaıda otandastarymyz júldeli orynnan kórine almady.
66 kelide Meırambek Aınaqulov birinshi aınalymda úndistandyq Ravınder Sınhtan jeńilse, 98 kelide Erulan Ysqaqov ta ázerbaıjandyq Orhan Nýrıevke ese jiberdi. 85 kelide Ashat Dinmuhamedov eston Erık Epsty 4:2 esebimen jeńgenimen, ekinshi aınalymda japon Taıshı Okadan 0:2 esebimen jeńildi.
Ózbekstan quramasy quramynda beldesetin qazaq Ermurat Tasmuratov 59 kelige deıingi salmaqta Olımpıada joldamasyn ıelendi. Ol London Olımpıadasyna da qatysqan bolatyn.
Aıta keteıik, Ermurat kúres álippesin Shymkent qalasyndaǵy B. Sattarhanov atyndaǵy mektep-ınternatta úırengen.
