Ózbekstandaǵy halyqaralyq aıtysta bas júldeni ońtústikqazaqstandyq Birjan Baıtýov jeńip aldy
ASTANA. QazAqparat - Mamyrdyń 19 kúni Ózbekstannyń Navoı qalasynda (Áıteke bıdiń mazary jatqan aımaq) Áıteke bıdiń 370 jyldyǵyna jáne qazaq-ózbek dostyǵyna arnalǵan halyqaralyq aıtys ótti, dep habarlaıdy Kazaitys.kz portaly.
Aıtys ótken Farhat saraıyna qandastarymyz lyq toldy. Buǵan deıin ol aımaqta mundaı joǵary dárejeli aıtys ótpegen eken. Aıtysty qorytyndylaǵanda: Bas júldeni - Ońtústik Qazaqstan oblysynyń aıtysker aqyny Birjan Baıtýov qanjyǵalasa, birinshi oryndy da ońtústikqazaqstandyqtar Karıma Oralova men Qajymuqan Abzalov bólisti. Ekinshi oryndy - jambyldyq Alık Bekmýsaev pen Qulmahan Dúısenov (Tashkent) ıelense, úshinshi oryndy - Jandarbek Qaıyrbek (Tashkent) pen Jambol Kópbosynov qanaǵat tutty.
