Ózbekstandaǵy iri magıstraldyq gaz qubyrynda apat boldy

TAShKENT. KAZINFORM — Ózbekstannyń Buhara oblysyndaǵy «Buhara-Oral» magıstraldyq gaz qubyrynyń 106 shaqyrymynda apat boldy, dep habarlaıdy Kazinform agenttiginiń menshikti tilshisi.

Oblystyq Tótenshe jaǵadaılar basqarmasynyń málimetinshe, qubyrdyń dıametri 1020 mm bolatyn bóligi qysym saldarynan jarylǵan.

— Mamandar jedel áreket etip, gaz jiberetin klapandardy japty. Tıisinshe, qubyrdyń boıynda qalǵan kógildir otyn shyǵyp, órt tolyq sóndirildi, — delingen vedomstvo taratqan habarlamada.

Tótenshe jaǵadaılar basqarmasynyń aqparatyna saı, zardap shekkender men qaza tapqandar joq.

«Buhara-Oral» gaz qubyry Ózbekstannan bastalyp, Qazaqstan arqyly Reseıge ótedi. Onyń uzyndyǵy 4,5 myń shaqyrymnan asady.

Qazirgi ýaqytta bul qubyr Ózbekstannyń ishinde kógildir otyn tasymaldaý úshin qoldanylyp keledi.

Eske salaıyq, byltyr Ózbekstan gaz ımportyn 2 ese arttyrdy.

Kógildir otyn óndirisin ulǵaıtý maqsatynda atalǵan el úkimeti bıyl 15 ýchaskede geologııalyq barlaý júrgizbek.

Sonymen qatar, 2024 jyly gaz ben elektr energııasyn zańsyz paıdalanǵan ózbekstandyqtar memleketke $108 mln shyǵyn keltirdi.