Ózbekstandaǵy parlament saılaýynda merziminen buryn daýys berý merzimi bekitildi

TAShKENT. KAZINFORM – Parlament saılaýy kúni túrli sebepterge baılanysty turǵylyqty jerinde bola almaıtyn ózbekstandyqtar úshin merziminen buryn daýys berý 16-23 qazan aralyǵynda uıymdastyrylady, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Ózbekstannyń Ortalyq saılaý komıssııasy qabyldaǵan tıisti qaýlyǵa saı, saılaý ýchaskelerinde merziminen buryn daýys berý jumys kúnderi saǵat 9:00-den 18:00-ge deıin jáne demalys kúnderi saǵat 11:00-den 17:00-ge deıin júrgiziledi.

Sonymen qatar, ÓR Ortalyq saılaý komıssııasynyń otyrysynda múgedektigi bar adamdardyń saılaýǵa qatysýyna qajetti jaǵdaı jasaý máseleleri de qaraldy.

27 qazanda ótetin parlament saılaýynda Zań shyǵarý palatasyna múgedektigi bar – 11, jergilikti kengashtarǵa 605 kandıdat tirkeldi.

Saılaý komıssııalarynda 1343 múgedek adam jumys isteıdi. Daýys berý kúni 830 myńnan astam múgedektigi bar saılaýshyǵa jeke erikti bekitiledi.

Eske salaıyq, buǵan deıin Ózbekstannyń Ortalyq saılaý komıssııasy parlament jáne jergilikti kengash depýtattarynyń saılaýyn 27 qazanda ótkizý týraly sheshim qabyldaǵan edi.

Sondaı-aq, Ózbekstandaǵy bıylǵy parlament saılaýy aralas júıe negizinde ótedi.