Ózbekstandaǵy parlament saılaýy ótti dep tanyldy

TAShKENT. KAZINFORM – Ózbekstandaǵy parlament saılaýy ótti dep tanyldy, dep habarlaıdy Kazinform agenttiginiń Tashkenttegi menshikti tilshisi Álıhan Asqar.

Ortalyq saılaý komıssııasynyń 13:00-degi málimetine saı, saılaýshylar tizimine engen 19,9 mln saılaýshynyń 47,6% daýys berdi.

«Saılaý ótti dep tanyldy», - dedi OSK tóraǵasynyń orynbasary Bahrom Kýchkarov BAQ ókilderine arnalǵan baspasóz máslıhatynda.

Ózbekstan zańnamasyna sáıkes, halyqtyń 33% saılaýǵa qatysyp, daýys berse, onda saılaý ótti dep tanylady.

Eske salaıyq, búgin Ózbekstanda Zań shyǵarý palatasyna (parlamenttiń tómengi palatasy) jáne oblys, qala men aýdan kengashtarynyń depýtattaryn saılaý ótip jatyr. Daýys berý 20:00-ge deıin jalǵasady.

Bıyl parlament saılaýy tuńǵysh ret proportsıonaldy-majorıtarlyq júıemen ótedi.

Sonymen qatar, saılaý kúni túrli sebepterge baılanysty turǵylyqty mekenjaıynda bola almaıtyn turǵyndar úshin 16-23 qazan aralyǵynda merziminen buryn daýys berý uıymdastyryldy. Onda 1 mıllıonnan astam saılaýshy óz tańdaýyn jasady.

Eske salsaq, parlament saılaýyna 5 partııa qatysyp jatyr: Ózbekstannyń lıberaldyq-demokratııalyq partııasy, Ózbekstannyń ekologııalyq partııasy, Halyqtyq-demokratııalyq partııa, «Mıllı tıklanısh» demokratııalyq partııasy jáne «Adolat» sotsıal-demokratııalyq partııasy.

Buǵan deıin habarlaǵanymyzdaı, Ózbekstandaǵy parlament saılaýynda keıbir ýchaskelerge elektrondyq daýys berý júıesi engizildi.