Ózbekstandaǵy ken ornynda quramynda kúkirtsýtegi joǵary gaz atqylady

TAShKENT. KAZINFORM — Ózbekstannyń Surhandarııa oblysyna qarasty Baısýn aýdanynda ornalasqan «Mýstaqıllık-25» («Táýelsizdik-25») ken ornynda gaz atqylady, dep habarlaıdy Kazinform agenttiginiń menshikti tilshisi.

Ózbekstan Energetıka mınıstrliginiń málimetinshe, oqıǵa 5 mamyrda saǵat 6:10–da bolǵan. Atap aıtqanda, «Mýstaqıllık-25» ken ornynyń № 202 uńǵymasynda qysym saldarynan aýaǵa quramynda kúkirtsýtegi joǵary gaz atqylady.

— Quramynda kúkirtsýtegi bar gazdyń taralýyn shekteý úshin tıisti sharalar qabyldandy, ıaǵnı, ot tutatyp, atqylap jatqan gazdy jaǵyp jiberý sheshimi qabyldandy. Ol jumys barlyq qajetti qaýipsizdik talaptaryn saqtaı otyryp júrgizildi, — delingen Energetıka mınıstrliginiń resmı habarlamasynda.

Oqıǵa aýmaǵy qorshaýǵa alyndy jáne jaǵdaı jaýapty vedomstvolardyń tolyq baqylaýynda. Mınıstrliktiń málimetinshe, janyp jatqan gaz irgeles aýdandardyń turǵyndaryna qaýip tóndirmeıdi.

Eske sala keteıik, bul «Mýstaqıllık-25» ken ornynda tirkelgen alǵashqy jaǵdaı emes. Byltyr qyrkúıekte № 604 uńǵymada quramynda kúkirtsýtegi shamadan tys gaz atqylap, saldarynan 4 adam kóz jumdy. Ol joly da shıki kógildir otyndy jaǵyp jiberý sheshimi qabyldanǵan edi.