Ózbekstandaǵy qazaqtildi mektepterde muǵalim jetispeıdi – Rasýl Kósherbaev

Búginde Ózbekstanda 370-ke jýyq qazaqtildi mektep bar. Degenmen olarda sabaq beretin muǵalimder jetispeıdi. Muny Astanada ótip jatqan sheteldegi qazaqtardyń «Otandastar» forýmynda etnıkalyq qazaq, Ózbekstan Ekologııa mınıstriniń keńesshisi Rasýl Kósherbaev aıtty, dep habarlaıdy Kazinform. 

«Qazir Ózbekstanda qazaq tilinde bilim beretin 370-ke jýyq mektep bar. Bul bilim ordalarynda matematıka, hımııa, bıologııa sııaqty birqatar pánder boıynsha muǵalimder jetispeıdi. Sondaı-aq, bul mektepterde qazaq tilindegi ádebıetter joqtyń qasy. Bul - balalardyń qazaq tilin tereń meńgerýine qıyndyq týǵyzyp otyr. Buǵan qosa, Qazaqstanǵa baryp oqyǵysy keletin jastar óte kóp. Biraq olarǵa qazaqstandyq oqý oryndaryna túsý úshin tapsyrý mindettelgen UBT-dan ótý múmkin emes. Sondyqtan sheteldegi qazaq jastaryn arnaıy emtıhanmen qabyldaý nemese áńgimelesý, jeńil test tapsyrý arqyly qabyldaýdy usynamyz», - dedi Rasýl Kósherbaev.

Ol qazaq mektepterindegi muǵalim tapshylyǵy máselesin sheshý úshin ózbekstandyqtardy Qazaqstanǵa jiberip oqytý qajet dep esepteıdi. Tıisinshe, bizdiń eldiń dıplomyn ózbek tarapy moıyndaýy kerek. Al, bul ázirge sheshilmegen máseleniń biri.

«Qazaqstanda oqyǵan mamandardyń dıplomyn Ózbekstanda moıyndaý - sheshimin kútip turǵan másele. Osy baǵytta eki eldiń jaýapty vedomstvolary jumys isteýi kerek. Sonymen qatar dúnıe júziniń eń úzdik 1 000 ýnıversıteti reıtıngine engen qazaqstandyq joǵary oqý oryndarynyń fılıalyn Ózbekstanda ashýdy oryndy dep sanaımyz», - dep usynys aıtty Rasýl Kósherbaev Kazinform agenttiginiń saýalyna jaýap bere otyryp. 

Aıta keteıik, Rasýl Kósherbaev Ózbekstan Parlamentiniń tómengi palatasy - Olıı Majlıste 8 jyl depýtat bolǵan.