Ózbekstandaǵy Qazaqstan azamattary referendýmda daýys berip jatyr
TAShKENT. KAZINFORM – Ózbekstan astanasynda ornalasqan Qazaqstan elshiliginiń janyndaǵy referendým ýchaskesi jergilikti ýaqyt boıynsha saǵat 07:00-de óz jumysyn bastady, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Tashkenttegi № 399 referendým ýchaskesi shet memleketterdegi eń iri ýchaskelerdiń biri. Búginde bul ýchaskedegi saılaýshylar tiziminde Ózbekstanda turaqty turatyn jáne ýaqytsha júrgen 600 Qazaqstan azamaty bar.
№ 399 referendým ýchaskesiniń tóraǵasy Jaslan Iskakovtyń aıtýynsha, munda múmkindigi shekteýli azamattardyń úıde tańdaý jasaýy úshin daýys berý jáshikterin jetkizetin toptar jasaqtalǵan.
Atalǵan ýchaskege Tashkenttegi joǵary oqý oryndarynda oqıtyn stýdentter, Ózbekstanda ýaqytsha jumys isteıtin jáne turatyn otandastarymyz, qazaqstandyq týrıster men issaparda júrgen azamattar keledi dep josparlanyp otyr.
Eske salaıyq, Tashkent qalasyndaǵy №399 referendým ýchaskesi Qazaqstan Respýblıkasynyń elshilgi ǵımaratynda (Abaı kóshesi, 1) ornalasqan. Onda daýys berý jergilikti ýaqyt boıynsha 20:00-ge deıin jalǵasady.
