Ózbekstandaǵy eń bıik ǵımarat Nest One qurylysy aıaqtaldy
Búkil Tashkent kórinetin meıramhana, lıýks páterleri men turǵyndarǵa arnalǵan 33 qoǵamdyq aýmaqtan turatyn Ózbekstandaǵy eń bıik záýlim ǵımarat Nest One qonaqtar úshin esigin aıqara ashty. Kazinform bul týraly Kun.uz saıtyna silteme jasap habarlaıdy.
Nest One kesheni jeke ekojúıe retinde jobalanǵan jáne premıým-klass páterlerin, keńselerdi jáne qalanyń keremet kórinisi bar 33 qoǵamdyq aýmaqty qamtıdy: dúkender, meıramhanalar, balalar oıyn alańdary, qysqy baq, demalys jáne sport alańdary.
Ózbekstandaǵy birinshi záýlim ǵımarattyń bıiktigi 267 metr jáne elýden astam qabaty bar. Ǵımarat qurylysyna 27 000 tonna temir, 150 000 tonna beton jumsalǵan. Ǵımarat myńnan astam adamnyń eńbegimen aıaqtaldy.
Záýlim ǵımarattyń qurylysy 2019 jyly bastalǵan. Ol alǵash ret qoldanylǵan kóptegen ınnovatsııalyq tujyrymdamalardy biriktiredi jáne kúrdeli ınjenerlik esepteýge negizdelgen. Ǵımaratta eń sońǵy álemdik tehnologııalar paıdalanylǵan jáne búgingi tańda álemdegi eń qaýipsiz záýlim ǵımarattardyń biri bolyp sanalady. Órt qaýipsizdigi barlyq halyqaralyq standarttardy eskere otyryp jasalǵan.
Nest One – Ózbekstandaǵy alǵashqy záýlim ǵımarat eldegi eń bıik turǵyn úı boldy. All Inclusive qyzmetteri tujyrymdamasy boıynsha salynǵan ǵımaratta barlyǵy 1029 páter jáne 29 joǵary jyldamdyqta tasymaldaıtyn lıft bar. 20 VIP páter bult astynda, 41-50-shi qabattardyń arasynda ornalasqan. Lıýks apartamentterdiń kópshiligi qazirdiń ózinde satyp alynǵan.
