Ózbekstandaǵy eki kanal halyqaralyq ırrıgatsııalyq mura retinde tanyldy
ASTANA. KAZINFORM – Ózbekstandaǵy Dostyq jáne Eski Túıetartar kanaldary 2025 jyly WHIS (Dúnıejúzilik ırrıgatsııa murasy) syılyǵyna laıyq dep tanyldy, dep habarlaıdy Ózbekstan Sý sharýashylyǵy mınıstrligi.
Bul syılyqty Halyqaralyq ırrıgatsııa jáne drenaj komıssııasy 100 jyldan astam paıdalanylyp kele jatqan jáne tarıhı mańyzy bar ırrıgatsııalyq qurylystarǵa beredi.
Dostyq kanaly Syrdarııa basseınindegi Qazaqstan men Ózbekstan arqyly ótetin iri transshekaralyq nysan sanalady. Eski Túıetartar kanaly – Zeravshan ózeniniń boıyndaǵy san ǵasyrlyq gıdrotehnıkalyq eskertkish.
Bul eki kanal Ortalyq Azııadan osy halyqaralyq tizilimge engizilgen alǵashqy nysandar boldy.
Eske sala keteıik, Ulybrıtanııa Ózbekstandaǵy kópsalaly medıtsınalyq ortalyqtardy basqarýy múmkin.