Ózbekstanda zııandy shyǵaryndylardy esepke alý jónindegi ulttyq reestr qurylmaq
Ózbekstanda aýaǵa bólinetin zııandy shyǵaryndylardy esepke alý jónindegi ulttyq reestr qurylady. Tıisti memorandýmǵa BUU-nyń Dýbaıda ótken Klımattyń ózgerýi jónindegi 28-shi konferentsııasy aıasynda Ózbekstannyń Ekologııa mınıstrligi men Industrial Innovation Group kompanııasy qol qoıdy, dep habarlaıdy Kazinform agenttiginiń menshikti tilshisi.
Vedomstvonyń baspasóz qyzmetinen málim etkendeı, memorandým Ózbekstannyń shyǵaryndylardy azaıtý jónindegi jalpyulttyq strategııasyna sáıkes jasalǵan.
Kezdesý barysynda Ózbekstannyń ekologııa mınıstri Azız Abdýhakımov reestrdi qurý klımattyń ózgerýi máselesin sheshýge, shyǵaryndylardy retteý júıesin ıntegratsııalaýǵa jáne olardy azaıtý jónindegi jobalardy yntalandyrýǵa yqpal etetinin atap ótti.
Óz kezeginde Industrial Innovation Group kompanııasy dırektorlar keńesiniń tóraǵasy Matar Tarıam yntymaqtastyqty ornatý Ózbekstannyń ornyqty damýyna jáne ekologııalyq táýekelderdi qysqartýǵa beıim ekenine taǵy bir dálel bolǵanyna toqtaldy.
«Birlesken yntymaqtastyq aıasynda qurylatyn zııandy shyǵaryndylardy esepke alý jónindegi ulttyq reestr – ekologııalyq táýekelderdi dál baǵalaıtyn jáne kómirtekti basqarý júıesin ázirleýdegi senimdi tásil», - delingen Ekologııa, qorshaǵan ortany qorǵaý jáne klımattyń ózgerýi mınıstrliginiń baspasóz qyzmeti taratqan habarlamada.
Toqtala keteıik, Industrial Innovation Group – shtab-páteri Birikken Arab Ámirlikterinde ornalasqan transulttyq kompanııalar toby. Kúrdeli, joǵary tehnologııalyq júıelerdi qurýda, aýqymdy ındýstrııalyq-ınnovatsııalyq keshenderdi jobalaý men salýda 30 jyldyq tájirıbesi bar iri kompanııa.
Buǵan deıin habarlaǵanymyzdaı, Dýbaıda ótken BUU-nyń Klımattyń ózgerýi jónindegi konferentsııasynyń sessııasynda Ózbekstan prezıdenti Aral óńirinde Klımattyq tehnologııalardyń halyqaralyq ekspo-habyn qurýdy usyndy.
