Ózbekstanda «zııandy» kólikterdi «taza» kólikterge aýystyrý úshin sýbsıdııa bólý josparlanýda
TAShKENT. KAZINFORM – Ózbekstanda «zııandy» sanattaǵy kólikterdi «taza» sanattaǵy kólikterge aýystyrýdy sýbsıdııalaý josparlanýda. Ekonomıka jáne qarjy mınıstrligi bir aı ishinde bul bastamany qarjylandyrý boıynsha usynystar ázirleýi kerek. Bul týraly Gazeta.uz jazdy.
29 naýryzda Ózbekstan premer-mınıstri Abdýlla Arıpov kólikterdiń atmosferalyq aýaǵa keri áserin azaıtý sharalary týraly qaýlyǵa qol qoıdy.
Qujatta avtokólikti aýystyrýǵa sýbsıdııa bólý qarastyrylǵan. Ekonomıka jáne qarjy mınıstrligine bir aı merzimde Mınıstrler Kabınetine «zııandy» sanattaǵy avtokólikterdi «taza» sanattaǵy avtomobılderge aýystyrý úshin halyqqa sýbsıdııalar bólý júıesin engizý týraly usynys engizý tapsyryldy.
Mınıstrlik sondaı-aq atmosferalyq aýany qorǵaý jáne onyń lastanýyna jol bermeý boıynsha «zamanaýı kózqarasqa negizdelgen» sharalardy qarjylandyrý boıynsha usynystar ázirleýi kerek.
Dál osy qaýlyda avtokólikterdi standarttarǵa sáıkes avtomatty túrde baǵalaý júıesin engizý, sondaı-aq jasyl, sary jáne qyzyl tústi – «taza», «ortasha» jáne «zııandy» ekologııalyq sanattaǵy japsyrmalardy taratý qarastyrylǵan.
Qańtar aıynda Qorshaǵan ortany qorǵaý mınıstrligi elektromobılderge kóshken kólik ıelerine jeńildikter, preferentsııalar men sýbsıdııalar belgileý mehanızmin qarastyrýdy usyndy.
Aıta keteıik, Seýlde (Ońtústik Koreıa) 2009 jyldan beri ekologııalyq taza kólikti satyp alýshylardy qoldaý baǵdarlamasy júzege asyrylyp keledi. Sýbsıdııalar usaq shań men parnıktik gazdardyń mólsherin azaıtý úshin bólinedi.
